Gutane lagde liv!
Etter ein solid oppvarmingsrunde blei Vassendgutane tatt varmt imot av eit stort og godt publikum. SJÅ BILDESERIE.
Bildeserie:
Vassendgutane leverte ein kanonkonsert i Oshallen fredag. Etter eit litt magert billettsal til fjorårets elles så vellukka konsert med Dance With A Stranger kunne arrangørane Os Turn Fotball i år sjå seg nøgd med å selja over 3/4 av dei 1200 billettane som låg for sal.
- Vi passerte 700 billettar midt på dagen fredag, og har nok over 800 inne no, sa Ove Hjelle til Midtsiden.no i 23-tida.
Scenevant debutant
Publikum blei tatt godt imot, også dei første som kom. Oppvarmingsbanda Scala og Frode Vidars spelte frå rundt klokka 20, først Scala, så Frode Vidars og så Scala igjen litt over klokka 21. Og då byrja det å bli liv i salen.
Scala-vokalist Øyvind Steffensen fekk låna dottera til fetteren til å avslutta oppvarminga, og Birte Særvoll imponerte med 4 Non Blondes-låta "What's up".
- Eg har berre sunge for publikum éin gong før, i kyrkja, men det var veldig kjekt å stå på scenen framfor så mange, seier Birte, som såg ut til å vera svært scenevant.
Birte fortel at ho syng i koret Latter, eit ganske nytt kor i Os, og at ho ikkje er med i noko band.
- Men eg kunne godt tenka med å synga i band! seier ho.
Kolle, kalv og krykker
Vassendgutane er kjent for blant anna låta Hjortejakt, og rundt halvparten av bandet er ivrige hjortejegarar.
- Sist eg jakta var på onsdag, då felte eg kolle og kalv, fortel Arthur Bjørdal, på krykker backstage før konserten.
- De syng om brennevin og jakt - korleis skadde du foten din?
- Eg måtte sparka den eine hjorten ihjel, spøkar Arthur, som trass i skaden ikkje hadde problem med å få publikum til å svinga seg på dansegolvet.
Bandet kom til Os fredag ettermiddag, og bur på Bjørnefjorden Gjestetun.
- Det var eit veldig flott hotell, vi liker oss godt her i Os, seier Lars Egil Vågseter.
Vassendgutane skal vidare til Jæren laurdag. Neste helg spelar dei på Askøy.