Gut mistenkt etter brann i busskur
Ein gut er mistenkt etter to branntillaup ved Amfi og Gymnasvegen.
Laurdag klokka 19.23 fekk politi og brannvesen melding om at bosspannet i busskuret nærmast rundkøyringa ved Amfisenteret sto i full fyr.
– Brannen var sløkt av publikum før vi kom fram. Dei hadde brukt vatn og cola dei hadde i bilen, fortel Anne Kjersti Storebø frå Os brannvesen.
Ein gut som blei observert i nærleiken blei mistenkt og politiet rykte ut til staden.
To branntillaup
Politiet tok hand om vedkomande, ein 16-åring, og kontakta mora.
– Ein patrulje frå Fana rykte ut og reiste heim på adressen for samtalar med guten og mora, fortel operasjonsleiar i Hordaland politidistrikt, Frode Kolltveit.
Det var òg observert restar etter branntillaup i tørt gras ikkje langt frå busskuret, retning Gymnasvegen.
Guten er mistenkt for å ha tent på begge.
Kontrollerte 54 bilar
I tillegg til UP sin trafikkontroll i Os sentrum laurdag var Os lensmannskontor på Byvegen på Søfteland.
– Dei sto langs E39 ved Søfteland skule frå klokka 9.52 til 11.
– Det blei testa for promille og 54 bilistar blei kontrollert. Alle var edrue, fortel Kolltveit.