Grønvigh ikkje først
«1-2-Osablod» er ei tøff tatovering, men Kjetil Grønvigh er ikkje den første som har stempla seg som osing.
Fredag skreiv vi om Kjetil Grønvigh frå Os Rockeklubb si nye tatovering, og nemnte vi at figuren, som er teikna av Torkjell Rød, kanskje er den første Os-tatoveringa.
Dette fekk vi fleire reaksjonar på, og dei fleste som tipsa oss om «Os inspires» ville vera anonyme.Pilene til dei dårlege kameratane peika i same retning, mot ein heller beskjeden berar av det som i alle fall er ei eldre Os-tatovering enn Grønvigh si.
- Du kan få sjå den, men eg vil vera anonym, sa han, og bretta gensaren ned og viste skuldra.
«Os inspires», Os kommune sitt slagord på engelsk, hamna på osingen si høgre skulder på Rhodos sommaren 2007.
Overraska kameraten
Årsaka til at beraren av tatoveringa vil vera anonym har ikkje noko med foreldra å gjera.
- He, he, nei det har det ikkje. Det blei berre ein litt morosam historie av det. På ein årleg fest diskuterte eg Os-tatovering med ein kamerat. Vi tok kvarandre i handa på at om ein av oss skaffa seg ei Os-tatovering så skulle den andre gjera det også.
- Sommaren etterpå var eg på Rhodos og bestemte meg spontant for å ta tatoveringa. Han eg hadde avtalen med visste ikkje noko før vi seinare den same sommaren sat på ein utestad i by´n ein heil gjeng. Han blei kvit i trynet då eg viste tatoveringa og han har framleis ikkje halde sin del av avtalen, humrar den Os-inspirerte osingen.