Gripen på Os
Død mann funnen i Bergen. Mann tatt av politiet på Os.
Natt til 17. mai gjekk politiet til aksjon på ei adresse i Os. Aksjonen heldt fram utover nasjonaldagen.
– Mannen blei utsett for vald for nokre dagar sidan, fortel politiadvokat Liv Giertsen til bt.no.
Mannen som blei funnen død budde ikkje på adressa politiet aksjonerte på, men skal ha blitt utsett for vald i Os for nokre dagar sidan.
Ikkje sikta for drap
Politiet undersøkte fredag husværet i Os på jakt etter spor. Det skal ikkje vera ei kjent adresse for politiet.
Ein mann skal vera tatt, men er ikkje sikta for drap.
Han vil bli sikta for vald og blir truleg framstilt for fengsling laurdag, ifølgje politiadvokaten.
Mannen skal etter det Midtsiden kjenner til har blitt tatt natt til fredag. Han skal ha blitt pågripen på ei anna adresse enn den politiet no undersøker.
Utsett for vald fleire gongar
Den omkomne mannen skal ha vore utsett for vald fleire gongar i dagane før dødsfallet.
– Vi knyter valden til fredag 10. mai. Mannen skal òg ha blitt utsett for vald ved Amfisenteret den same dagen. Vi ber vitne kontakta politiet, seier politiadvokaten til NTB.
Både den døde og mannen som er sikta for vald er i 30-åra.