Grieg deler ut 100.000 i Os
... men denne gong er det ikkje til Oseana.
– Vi fekk ei fantastisk melding i dag. Grieg Foundation har vedtatt å støtta Osfest med 100.000 kroner, seier Ole Reinert Berg-Olsen.
Grieg Foundation seier dette til mottakarane i Osfest i dag: "Vi ønsker lykke til med planlegging av festivalen som vi mener er viktig for Os".
– Å ha slike støttespelarar i ryggen betyr enormt mykje. Desse pengane er det publikum som kjem til å få glede av, seier Ole.
Osfest har til no lansert to artistar til festivalen, som finn stad i Os sentrum 1. og 2. august 2014: Dumdum Boys og Eirik Søfteland.
Passerte 500.000
Tor Egil Hylland, som saman med Berg-Olsen er initiativtakar til Osfest, fortel om god mottaking i sponsormarknaden.
– I tillegg til 100.000 frå Grieg Foundation og same sum i oppstartmidlar frå Os kommune har vi over 10 sponsorar med allereie.
Desse betalar frå 15.000 til 100.000 i støtte.
– Ikkje alle har bestemt seg for sum enno, men vi har minst éin av desse på 100.000 kroner og ein annan på 50.000.
– Uansett har vi allereie passert 500.000, og det er først i januar at vi startar tett oppfølging av bedriftene, og vi gler oss veldig over den gode mottakinga på planane våre, seier Hylland.