Google på gatenivå i Os

I Google Maps finn du både kart og satellit/orto-foto (flyfoto rett ovanfrå) over heile verda, bortsett frå enkelte område med militæranlegg. Dei siste åra har Google lansert Street View i by for by, ei teneste der du frå flyfoto eller kart kan plassera deg sjølv (digitalt) direkte i gata og sjå vassrett 360 gradar.

I dag blei første del av den nye tenesta lansert for fleire norske byar, og for blant anna tettstaden Os. Og det er ikkje berre Osøyro som er grundig fotografert, hovudgatene ut til krinsane kan du også studera nærmare.

Her kan du sjekka Street View i Os.

Zoom i kartet og trykk på den gule figuren over zoom-knappen, dra den inn i den gata du vil "stå" i, og vips der kan du sjekka ut området. Ikkje LIVE, men likevel litt stilig.

Litt betre frå lufta
Bergen kommune sendte for nokre år sidan eigne ortofoto til Google, medan Os kommune let Google ha dei ganske dårlege satellittbilda dei hadde.

No ser det ut som om kvaliteten på bilda av Os tatt frå lufta er betre. Men for Os og andre småstadar er det framleis på kommunen sine eigne sider eller på norgeibilder.no du finn dei beste bilda tatt frå lufta.