– Godt med ein siger igjen
Os leia 4-0 etter 46 minutt spel mot Bergen Nord i dag - og tok sigeren i land, men med nokre baklengsmål.
Bildeserie:
Os skulle møtt Vadmyra til treningskamp laurdag, men kampen blei avlyst.
I dag sto Bergen Nord for tur og Os var motiverte for siger etter tap for Fana og Tertnes i dei to siste treningskampane.
Bergen Nord rykte opp frå 4. til 3. divisjon med Os-trenar Tore Nielsen som leiar, men rykte ned igjen frå Os si naboavdeling i fjor haust.
Os - Bergen Nord 4-2 (3-0)
Målskårarar, Os: Egil Thuen, Preben Borgen, Mads Lepsøe (straffe) og Christer Olsen.
Os: Anders Kloven - John Ole Johannesen, Torkel Hjertnes, Børge Borgen, Glenn Krossøy - Stian Lunde, Preben Borgen (Sander Kvittingen), Mads Lepsøe - Håkon Kvittingen, Egil Thuen og Christer Olsen.
Os måtte klara seg utan blant andre Erik Kanestrøm, Ramo Racic, Per Søgnen Merai og Tore Valvik i dag.
1-0: Egil Thuen på eit av fleire gode løp på venstre kant, la ballen fint forbi keeper og innanfor lengste stolpe, 1-0 cirka 10 minutt ut i kampen.
2-0: Preben Borgen, corner og rett i mål i 35. minutt. Det såg først ut som om Torkel Hjertnes stussa den vidare med hovudet, og at Stian Lunde lirka den inn på bakerste stolpe, men corneren frå Borgen gjekk rett inn.
3-0: Mads Lepsøe skyt og det blir dømt hands innanfor 16-meteren og straffe. Mads set straffen sjølv, hardt og presist til høgre for keeper minuttet før pause.
4-0: Knapt eitt minutt er spelt av andre omgang når ein lang ball bli chippa over til Christer Olsen på løp. Olsen sitt mottak går mot mål og ein keeper i ubalanse, i fart i motsett retning.
4-1 kjem i 68. minutt. Ein Bergen Nord-spelar eit stykke utanfor 16-meteren får ta imot ballen og venda om, og skyt slapt, men presist, stang-inn. 4-2 kjem på straffe i 75. minutt etter hands innanfor 16-meteren på eit innlegg.
I 81. minutt skårar Mads Lepsøe, trass i at han blei stygt takla av keeper. Men målet blei feilaktig annulert for angrep på keeper.
– Må kommunisera betre
– Vi skaper mykje og er i pausen einige om å halda nullen, men så skjer det motsette. Det er eg ikkje nøgd med. Og så ser eg at vi offensivt må jobba meir med kommunikasjon, seier Tore Nielsen etter kampen.
Bergen Nord hadde ein del å by på og Os kan takka ein stødig Kloven og ein flittig og god Børge Borgen for at det sto 3-0 til pause.
Skapte mykje
Os skapte mykje i begge omgangar, og styrte kanskje kampen meir i 2. omgang, sjølv om det var då måla kom imot.
Midtstopparane Torkel og Børge jobba godt, sto bra plassert og leverte presise ballar. Egil og Christer kom til mange sjansar og utover i kampen spelte Mads betre og betre saman med Preben i små rom.
– Nokre av spelarane våre må bli flinkare med å sleppa ballen litt før, og så må vi, når vi blir litt lettare i beina, koma raskare etter med fleire folk i angrep.