God framdrift
Sjølv om vinteren har vore rolegare enn sommaren har det vore god framdrift på Lyngheim.
Bildeserie:
- I vinter har vi konsentrert oss om det bygningsmessige og det største løftet vi har fått gjort er steintaket, fortel Magne Brekke, styreleiar i stiftinga Det historiske tunet på Lyngheim.
- Det blei kjempefint.
Innvendig har lemstova no fått bakaromn og grue og no er det hellegolv, golvet på lemen og det offentlege toalettet som står for tur.
Planane vidare
Før det historiske tunet står ferdig gjenstår det blant anna planering og hellelegging av området.
- Og så skal vi dandere terrenget så vi får eit naturleg amfi.
- I tillegg skal vi, i samarbeid med Os kommune, heve terrenget ved snuplassen og få på plass handikap-parkering.
Stiftinga har plan om å kunne opne tunet for osingane i august 2014, men om dei når det målet kjem an på finansieringa.
- Vi er i rute og satsar framleis på opning august, men vi manglar ein del midlar.
- Vi har søknader inne hos fleire fond og private sponsorar, mellom anna hos Visjon Vest og Stiftelsen UNI.
Møteplass for alle
I løpet av våren vil stiftinga gå i samtale med barnehagar, skular og eldrebustader i Os.
- Vi må byrja å planleggja bruken av tunet no når vi har kome så langt i prossessen.
Brekke håpar Lyngheim vil bli ein ny møteplass for alle i Os, frå tilfeldige turgåarar til organiserte arrangement.
- Anten om du vil prøva brødbaking i bakaromn, læra handtverk, eller berre tar ein pust i bakken og ein kopp kaffi og vaffel, her er alle velkomne.