God effekt av nye fråværsreglar

Før skuleåret som starta for eit år sidan blei ny fråværsgrense på 10 prosent innført i dei vidaregåande skulane over heile landet.

• Les òg: Svarte på spørsmål om nye fråværsreglar

Resultatet er, ikkje uventa, av det udokumenterte fråværet har gått ned.

Ved Os vgs var snittet 5 dagar og 9 enkelttimar førre år.

Os Gymnas fortel om nedgang frå 7,98 til 4,09 dagar og frå 16,62 til 15,38 enkelttimar.

Begge skulane fortel at dei ikkje såg fråvær som eit stort problem før, og at dei ikkje hadde bedt om dei nye reglane, men at det har fungert godt.

Fleire fekk vurdering trass strengare grense

Like viktig har det vore at mange unngår å hamna i den situasjonen at dei ikkje får vurdering (karakter) i eit fag.

– Trass strengare reglar er det berre 0,5 % av elevane våre som har opplevd å ikkje få vurdering i eitt eller fleire fag, seier rektor ved Os vgs, Johan Henrik Lassen.

Ved Os Gymnas gjekk talet på elevar med I.V. (ikkje vurdering) ned frå 1,30 til 0,46 %.

– Berre åtte elevar opplevde å få IV som følgje av udokumentert fråvær. Dette er svært lågt. Talet på stryk gjekk òg ned, seier rektor Trond Eikeland.

Os betre enn snittet

Med innføring av dei nye reglane følgjde auka innsats av rådgjevarar og ressursteam, betra tilbod frå helsesøster og skulepsykolog (ved hjelp av Os kommune) og tidleg reaksjon ved fråvær, for å unngå at nokon ramla av lasset.

I snitt er det, ifølgje SSB.no, 73 prosent av elevane i Noreg som fullfører vidaregåande utdanning.

Ved Os vidaregåande skule var det 90,4 prosent som fullførte på yrkesfag og 71,7 prosent som fullførte allmenn påbygg. Totalt ligg skulen på eit snitt på 88,4 prosent som fullfører utdanninga.

Ved Os Gymnas seier Eikeland at det kan vera vanskeleg å seia noko konkret når det kjem til gjennomføring.

– Ein vanskeleg eksamen kan gje utslag. Men etter at dei har fått ta denne om igjen, og bestått, vil eleven få vitnemålet.