God drenering i Os
Osbygda tar, til no, fint imot dei store nedbørsmengdene. Sjå bildeserie av elv og hamn to timar før full flo.
Bildeserie:
Det har regna tett det siste døgnet og ulike vatn og elver i Os er langt høgare enn normalen.
– Vi har så langt ikkje hatt nokre oppdrag i samband med nedbørsmengdene, seier teknisk vakt i Os kommune, Robert Flister til Midtsiden tysdag formiddag.
Teknisk eining har førebudd seg godt og fått rydda vekk lauv og andre ting som kan sperra rister og avlaup.
Fare for jordskred
– Vi er førebudd på å hjelpa om det kjem fleire oppdrag samtidig, seier brannsjef Stein Gjøsund.
Heller ikkje brannvesenet har fått meldingar om problem i samband med dei store vassmengdene.
– Men følg med på terrenget rundt deg. Ser du sprekker i bakken eller i asfalt er det verdt å varsla. Mange av bakkane i Os er nok meitta av vatn og vi får tett med meldingar frå NVE og frå Fylkesmannen, blant anna med beskjed om at det er fare for jordskred.
OPPDATERT: Brannvesenet var tysdag kveld på Drange, der ein utriggar frå ei flytebrygge låg på rek. Utriggaren blei festa til land.
Bølgjene står også høgt i Os hamn, sjølv om det er to timar til full flo. Det er meldt ekstra høg flo og sjøen skal vera på topp klokka 13:18 i dag.
Har du tips eller bilde? Send til Midtsiden på kjetil@midtsiden.no eller 90789270.