Gledeleg gjensyn
Det blei eit gledeleg gjensyn då Roger Cipo frå CARF i Brasil møtte Vilde og Håvard frå Os barneskule onsdag. – Dette betyr mykje for borna i Kolibriredet, fortalde Cipo.
Torsdag var dagleg leiar Sigve Fjelltvedt frå CARF og instruktør Bøye Skeie Fjelltvedt frå capoeiraklubben Beja-Flor på Os barneskule for å takke elevane for innsatsen dei gjorde under Gregory Smith-kvelden i sluten av mai. Med seg hadde dei òg Roger Cipo frå KolibriCARF i Brasil.
Dei tre fekk overrekt sjekken på 56 970 kroner av Vilde Nordvik og Håvard Leonsen som i fjor var på vitjing i Brasil saman med Geir og Ida Bjørkhaug.
– Det blei eit hjarteleg gjensyn mellom "våre" fire og Roger, fortel rektor Beate Moberg.
– Dei fire hadde ein oppleving dei seint vil gløyma. Vilde og Håvard fortalde meg i dag at dei gjerne vil reise tilbake ein dag for å treffe alle borna igjen.
Vilde Nordvik og Håvard Leonsen har etter at dei var i Brasil vore rundt på fleire skular og tilstelningar for å fortelje om opplevingane sine i Brasil og korleis borna lever i slummen og kva arbeid CARF gjer for å hjelpa dei.
Betyr mykje
Gjennom snart 20 år har elevane på barneskulen arrangert Gregory Smith-kvelden siste torsdagen i mai.
– Det har vore mange folk innom i løpet av dei åra. Elevane har lagt ned eit imponerande stykke arbeid.
– Berre no i år var det sikkert 1000 små og store innom, smiler rektor.
– Roger og Sigve fortalde oss kor mykje arbeidet betyr for borna i Brasil.
– 56 970 kroner er svært mykje pengar i Brasil og rekk mykje lenger enn dei gjer her i Noreg.
Som ein takk for hjelpa kjørte dei to capoeira-danserane ei oppvisning kor også elevane fekk ta del i den kampsport-lignande dansen.