Gjennom veggen - igjen!

Natt til måndag 27. februar knuste tjuvar seg gjennom murveggen på nordsida av Joker-butikken på Søfteland og stal sigarettar til ein verdi av rundt 60.000 kroner.

Les òg: Spinkel tjuv stal for 60.000 kroner

I dag, tysdag 20. mars, oppdaga kokken Kenneth Milde at butikken igjen hadde hatt ubedne, men slagkraftige gjestar.

Politiet er interessert i tips om ein mørk bil som var i området rundt klokka 00.30 i natt.

– Kenneth kom på jobb klokka 6.30. Då var straumen vekke, fortel innehavar Duddun Lindborg.

– Inne i butikken såg han at folk hadde knust hol i veggen igjen.

Brukte slegge

Også denne gong er holet i murvegg og ikkje i trevegg.

– Men det ser ut som om dei ikkje har brukt vinkelkuttar denne gong, berre slegge.

– Holet er eit stykke bortanfor førre hol, det ser ut som om dei har vore ute etter å ta seg inn i safen frå baksida.

Stal for 140.000 kroner

Krimteknisk blei kopla inn og var i over tre timar på åstaden.

– Tjuvane har ikkje fått opna safen, men dei fekk opp eit anna skap. Det tømte dei for sigaretter.

Til saman har butikken blitt loppa for 200.000 kroner i sigaretter på tre veker.

Skuffa over vaktselskapet

– Eg er litt skuffa over vaktselskapet, som ikkje kontakta meg då straumen gjekk. Dei sa dei hadde ringt og sendt sms, men eg har verken tapt anrop eller ulest tekstmelding på telefonen min. I dag klokka 14 fekk eg melding om straumbrot. Det var litt seint.

– Dessuten burde dei, då dei ikkje fekk kontakt med meg, tatt seg ein tur og sett på saka.

Lindborg har selt butikken. Ny eigar overtar om ti dagar ...