Gjekk nær 1 mill i pluss

Årsrekneskapen og årsmeldinga frå Oseana blei handsama i formannskapet torsdag. Der kjem det fram at det kommunale føretaket omsatte for 14,1 millionar i 2015, mot 17 millionar i 2014. Likevel klarte kunst- og kultursenteret å dobla overskotet frå 452 077 i 2014 til 934 436 i 2015.

Overskotet skuldast i hovudsak ekstra ordinære provisjonsinntekter frå kunstsal, midlertidige innsparte lønskostnader og premieavvik på pensjon heiter det i årsmeldinga. Men også den underliggande drifta går i balanse.

Pushwagner-utstillinga blei ein kjempesukess og det blei selt bileter for nær 3 millionar kroner, noko som var ein viktig bidragsyter til overskotet.

– Vi er veldig nøgd med at vi har klart å ha pluss i rekneskapen dei to siste åra. Det er kjærkomne midler for å ivarta bygningsmassen og gå inn i prosjekter som er spennande, sa Terje Søviknes (Frp), ordførar og styreleier for Oseana KF.

Stabile besøkstal

Vel 70 000 var innom dørane i den kulturelle storstova i løpet av 2016. I tillegg kjem dei som har nytta seg av restauranten. Dette er omlag på same nivå som tidlegare år.

I 2015 auka ein talet på arrangement frå 96 til 117, men selde 8230 færre billettar enn i 2014. Dette er omlag på same nivå som i 2013.

– Det er greie besøkstal. Vi har lykkast med dei to hovudsatsingane i fjor. Auka fokus på kunstsamlinga og kunstformidling mot barn og eldre.

– Det jobbast aktivt med å få opp omsetninga på reine komersielle arrangement. Det har vore ei positiv utvikling, spesielt på restaurantsida. Etter jul har ein rett nok merka at det har vore tyngre i det bedriftsretta markedet, men på privatmarkedet med barnedåpar, konfirmasjoner, selskap og bryllaup er utviklinga slik at ein heller har ei kapasitetsutfordring av og til. Allereie er det gjort ein god del bestillingar for neste år, fortalde Søviknes.

Har funne si form

Formannsskapsmedlemma var nøgd med korleis utviklinga har vore og at samarbeidet med kulturskulen no har satt seg.

– Det er kjekt å sjå at Oseana gjekk med solid overskot. Viktigare enn det er at Oseana ser ut til å ha funne sin form og fasong. Det virkar som dei har funne sin plass i bygda og dei har blitt flinkare til å involvera befolkninga. Det at ein får inn innbyggjarar heilt frå skulealder er veldig bra. Eg er optimistisk i høve tida som kjem, konstanterte Jon Sivert Rykkel (V).