Gav åtvaring til vannskuterførar
Fekk melding om høg fart på ein av få plassar det ikkje er lov å køyra fort.
I 19.40-tida onsdag fekk politiet melding om hurtigkøyring med vannskuter i Hauglandssundet.
– Ein patrulje har snakka med førar, han fekk ei muntleg åtvaring, skreiv Vest politidistrikt på Twitter.
Hauglandssundet er ein av tre stadar i Os der det er sett lokal fartsgrense. Fartsgrensa er 8 knop.
Lensmann Oddbjørn Dyrdal fortel at politibåten «Kjølen» var i området, men eit stykke unna, så ein lokal patrulje rykte ut.
– Dei var ikkje heilt sikre på at vedkomande var den som hadde køyrd for fort, derfor blei det ein samtale. Vi har nokre slike av og til. Vedkomande kjente til reglane, og dei fekk ein fin prat, seier Dyrdal.
Generelle og lokale fartsgrenser
I Os er det sett lokale fartsgrenser to andre stadar; 5 knop i Os hamn og i Vargavågen, mens det er 8 knop frå Blindasundet til innseglinga til Halhjem ferjekai.
Utanom lokale reglar seier «Forskrift om fartsbegrensninger i sjø, elv og innsjø» (Lovdata.no) noko om fartstilpassing på sjøen:
§ 2.(generell fartsbegrensning)
Fartøyer skal utvise forsiktighet og avpasse farten etter fartøyets størrelse, konstruksjon, manøvreringsevne og farvannsforholdene, slik at det ikke ved bølgeslag eller på annen måte oppstår skade eller fare for skade på personer, herunder badende, andre fartøyer, farvannets strandlinjer, kaier, akvakulturanlegg eller omgivelsene for øvrig.
§ 3.(fartsbegrensning ved passering av badende og ferdselsforbud mv. innenfor oppmerkede badeområder)
Fartøy som nevnt i § 1 som passerer innenfor en avstand av 50 meter fra steder hvor bading pågår, skal ikke gå med større fart enn 5 knop (ca. 9,2 km/t).
