Gatelag i handball: Historisk kamp i Oshallen
Os har Norges einaste gatelag i handball, men har no kasta i gang eit stort lag frå nabokommunen.
Det som starta som Os kommune sitt «Prosjekt Livskvalitet» har breidd om seg frå snekkerbu til ei lang rekkje idrettar og aktivitetsttilbod.
Nytt av året er gatelag i handball, i samarbeid med Os Handball, leiar av dagleg leiar Christian Bugge, mens dei kommunale einingane Vartun og Grantun stiller med hjelpetrenarar og vikarar.
– Eg hadde ingenting å gå til, og lite hjelp med oppfølging, og så oppdaga eg dette! No deltar eg på alt, frå fotball og yoga til handball, og eg har einheilt annan kvardag! seier Alex, ein av spelarane.
Os er først i Norge med gatelag i handball, og jobbar med å få andre idrettslag i sving.
– Målet er å få mange nok lag til at vi kan invitera til ei turnering, på sikt også å spela serie, seier Tor Arne Hitland frå Vartun.
– Handball har blitt godt mottatt lokalt, på førre trening var vi mange nok til å spela mot kvarandre med to fulle lag. Men vi skulle gjerne hatt fleire motstandarar, seier kollega Lars Petter Grønivgh frå Grantun.
Mens handballsjef Bugge er i kontakt med både krets og handballpresident, har Hitland og Grønvigh fått kontakt med eit stort og aktivt lag i Bergen.
– Psykiatrialliansen er ein frivillig organisasjon bygd opp som eit bedriftsidrettslag. Idrettslaget tilbyr ikkje behandling, berre aktivitet, seier Lasse Hjelle.
Psykiatrialliansen blei stifta i 2006 som eit samarbeid mellom Helse Bergen og Bergen kommune. Lasse er einaste fulltidstilsette
– Vi har ikkje medlemsregister, vi spør ikkje kvifor folk kjem, om dei slit med rus, har psykiske utfordringar, er einsam eller berre glad i idrett. Vi vil berre skapa ein god og sunn møtestad, gratis og open for alle.
Dei har rundt 400 deltakarar på 28 faste aktivitetar i veka, frå innebandy og kampsport til fotball og svømming.
I går stilte ei gruppe leiarar og deltakarar i ein av dei to nye hallane i Os idrettspark for å prøva seg i ny aktivitet - handball mot pionerane frå Os.
Imponerande spel - få skåringar
Os lånte vekk to av sine spelarar til gjestane frå by'n. Etter oppvarming var det samling, kort gjennomgang av reglar og kampen kunne gå i gang.
Nokre av spelarane har vore på handballbanen før, andre har berre trent i Os desse første månadane, mens nokre prøvde handball for første gong.
Psykiatrialliansen, styrkt med to frå Os, fekk den beste starten, og gjekk opp i 0-2.
Til pause sto det 3-5, så henta Os seg opp til 7-8 før gjestane skåra to og vann 7-10.
Dei ferske spelarane gjorde svært få personlege feil. Sentringane var presise, ballen gjekk fort mellom medspelarane og skota var i periodar gode.
Men begge lag hadde gode keeperar, etterkvart også bra forsvarsspel.
Bildeserie:
– Så gjestfrie de har vore er eg sikker på at de også gav oss denne sigeren, litt for å sikra at dagen skulle gi meirsmak, spøkte 0-1-skårar og lagleiar Jan Ove Næss etter kamp.
Då sat begge laga saman i de vesle, nye klubbhuset over kiosken mellomfotballbanane for å eta rundstykker med eggerøre og laks, eller karbonader og nysteikt lauk.
Bildeserie:
– Eg må seia at eg er mektig imponert over kva dykk har fått til, og for opplegget rundt kampen, la Næss til.
No vil gjestane planlegga handball som aktivitet snarast mogleg over nyttår.
– Eg håper dette er starten på noko som gjer at vi kan laga ein julecup neste år. Samtidig held vi fram med å prøva å nå ut til dei større klubbane i Bergen for å sjå om endå fleire vil starta gatelag i handball, seier Bugge.
