Går frå Åsane til Lysekloster
Kjem på lån ut sesongen, foreløpig.
Lysekloster fortel i dag at dei har signert ein ny spelar.
Ole Kallevåg kjem på lån frå Åsane ut sesongen.
– Vi takkar Kåre og folka i Åsane for eit foreløpig godt samarbeid, skriv Lysekloster i samband med presentasjonen.
Kallevåg fyller 21 år i juni. Han har vakse opp i Bremnes, skåra 5 mål på 18 seniorkampar i 5. divisjon då han i 2018 var 17 år og gjekk så til Stord.
I 2019 skåra han heile 10 mål på 24 kampar, blant anna hattrick då Stord slo Brann 2 5-2 og 0-1-målet då Stord slo Os på Kuventræ.
Lysekloster tar imot Os til NM-kvalik laurdag.
Nysigneringa spelte for Åsane mot Lysekloster i 1. NM-runde i fjor. Då vann Åsane 1-2.
Han fekk 13 A-kampar og 7 B-kampar for Åsane i fjor.
Den siste Åsane-kampen hans var det tunge cupoppgjeret mot Sarpsborg 08 13. mars.
Lysekloster varslar at det kan koma nok ei signering før overgangsvindauget stenger.
