Gamlekara tok revansj
Bildeserie: Det var mykje fotballintelligens samla på Kuventræ laurdag. Dei visste kva dei skulle gjera, men farten var ikkje heilt den same som i gamle dagar.
Bildeserie:
Gamlekara frå Os Turn sit a-lag på midten av 70-talet tok laurdag i mot studentlaget frå NTH (no NTNU) til showkamp på Kuventræ laurdag ettermiddag.
Med Ole Johan Valle i mål fekk studentane frå Trondheim eit tøft møte med Os-gutane.
Sist dei to laga møttest, i 2008, vann studentane 4-1, laurdag var det Os sin tur til revansj og siger 4-2.
– Vi har forsterka med eit par landslagsspelarar frå sist, fortalde Gunnar Moberg før kampen.
Tre frå Just´n
Ein av landslagsspelarane Moberg sikta til var Erik Just Olsen, som var på reise i USA sist dei to laga møttest.
– Eg var med å trena med gamlekara i Brann i vår, men rauk menisken i første kamp.
– Eg har difor ikkje spelt fotball sidan i mai, men må vel klara 5 minutt, sa Just´n før start.
Han blei ståande heile kampen og skåra ikkje mindre enn tre av Os sine fire mål.
Moldskred konge på midten
Ein av dei andre førande på Oslaget var Cato Moldskred. I motsetning til dei fleste andre, på båe laga, hadde han framleis farta i behald.
Assist på 1-1, mål på 2-1 og ny assist på 3-1 kan Moldskred notera seg etter kampen.
Studentane frå NTH tok leiinga 0-1. 1-1 kom frå Erik Just Olsen etter pasning frå Moldskred. 2-1 gjer Cato Moldskred aleine. Han tek med seg ballen frå midten, rundt på sida og set ballen under Valle i NTH-målet.
3-1 kjem etter ein smart, kort cornar, kor Moldskred løftar ballen på bakre stolpe, kor Just´n set ballen kontant i mål.
NTH utlignar etter mykje klabb og bakk framfor John Lepsøy i Os målet, før Just Olsen fastsett slutresultatet til 4-2 etter eit langt innlegg frå midten, kor han brystar ballen i mål.
– Det er litt uvant å stå med slike svære hanskar.
– Du veit då eg spelte, så sto eg med heimespøta hanskar av garn og lær, fortalde superveteranen John Lepsøy.
Heile 70 tilskodarar hadde tatt turen til Kuventræ for å få med seg showkampen.