Gamblar på gamalt lykkehjul
Bildeserie: Vårsleppet i Os sentrum er i gang.
Bildeserie:
Laurdag formiddag klokka 10 starta årets vårslepp i Os sentrum med gratis frukost.
– Vi har hatt rundt hundre gjestar her i løpet av den første halvtimen, fortel leiar i Os Sentrumsforening, William Lindborg.
Benkar og bord er rigga under telt på Torget, men sola skin, temperaturen aukar og det ligg an til å bli ein fin marknadsdag.
Rusta opp gamalt lykkehjul
Butikkar har flytta varene sine ut, tilreisande utstillarar sel lokalprodusert mat og ulike organisasjonar tilbyr aktivitetar og konkurransar.
Orienteringsklubben sørgjer for å gje folk ei utfordring, mens Os Musikkforening har ei anna form for spenning å by på.
– Dette lykkehjulet blei brukt av musikkforeninga på 70-talet. No har det blitt funne fram frå ein låve, rusta litt opp og er klart for første test på mange år, seier Berit Sjøvold Askvik.
Saman med hjulet høyrer ei bordplate der du, med kleklype, kan visa kva bokstav du vil setja pengar på. Treff du godt er det rikeleg med premiar på nabobordet.
Debutant fekk draumestand
Ein av dei meir merkantile utstillarane er debutant Konseptbygg Eiendom. Selskapet er i gang med å selja 37 leilegheiter i Stegen, på den gamle barnehagetomta som ligg rett ved sentrum.
– Vi ba om å få stå med utsikt opp til tomta, og er veldig nøgd med plasseringa, seier marknadssjef Olaug M Hauge.
Ho står på stand med salssjef Karl Holtan.
– Vi har ikkje folk oppe på tomta i dag, men vil køyra ei ny tomtevising igjen om ikkje så lenge. Salet er i gang, og fleire av dei største husværa har gått først, fortel Holtan.