Fylte på med meir «åker» på Øyro
Os Bondelag 150 år: No gror det fire gongar så mykje kål og poteter midt i sentrum.
Bildeserie:
I april fortalde Os Bondelag om korleis dei vil skapa eit sentrum «til å eta opp». Det som gror i gatene på Osøyro no skal nemleg etast i Os sentrum under ein stor og svært kortreist fårikålmiddag på Bondens Dag 30. september.
I samband med at Os Bondelag fyller 150 år blir det i 2017 ein utvida versjon av Bondens Dag.
– Det blir nesten ei landbruksmesse, seier Olav Botnevik og ler.
– Vi skal ha fleire dyr med til sentrum enn før, og samlast på grusplassen ved ungdomsskulen. I Landboden, mellom Øyro og grusbanen, kjem det til å stå mange landbruksmaskiner utstilte.
Før kåring av det flottaste værlammet og servering av fårikål må dei få sauane ned frå fjellet, derfor er årets feiring av landbruket fire veker seinare enn normalt.
Aukar frå 2 til 10 dyrkingskassar
Under Vårsleppet i Os sentrum siste helga i april blei dei første to dyrkingskassane sett ut. Kassane er produserte av Os Asvo.
Tysdag kveld kom bøndene Olav Botnevik og Erlend Moberg til Os med kvar sine traktorar for å fylla på med fleire kassar.
– I kveld har vi med seks kassar, og det gror allereie godt i alle, seier Botnevik.
Til saman skal ti kassar plasserast ut, så dei som ferdast i sentrum kan sjå korleis det gror.