Fylte kjellaren med rap, pop og bleepjazz
Ungdom frå fleire nabokommunar valfarta til Kuventræ for konsert med seks ulike band og artistar.
Bildeserie:
Dei unge arrangørane i URO, som blei starta i 2017, arrangerte i helga sin fjerde konsert.
Denne gong gjekk arrangementet av stabelen i Os Rockleklubb sitt lokale på Kuventræ.
På plakaten sto seks band og artistar:
• Z&F: Jenteduo frå Fusa
• About Character: Alternativ rock med Ole Jørgen og Leon
• Fucales: Fersk skrangletrio frå Bergen
• NAOMI: «To unge pene som ikke liker å trene og hater å sitte heme»
• Jonas: Dansbar bleepjazz frå guterommet
• DERIN: Bergensrappar og Eggstock-vinnar
– Konserten blei godt besøkt. Folk kom tidleg og blei verande til det var slutt, fortel Lilly Mae Grønvigh, ein av arrangørane i URO.
Sjølv om konserten starta allereie klokka 17 laurdag ettermiddag, kom folk raskt i god stemning.
– Mange forbinder nok URO med rock, men denne gangen var det verkeleg god variasjon i sjangrar og mykje dansbar musikk. Headliner DERIN blei naturlegvis ei god avslutting på kvelden, men det var fleire som skapte liv på dansegolvet.
Jonas er blant dei som blir nemt.
– Det såg ut som om han skulle rigga opp til LAN-party med utstyr og skjermar. Eg trur dette var hans første konsert, men han var kjempeflink, og folk likte musikken hans veldig godt.
– Kjekt å sjå publikum kosa seg med livemusikk
URO hadde open kiosk på det rusfrie arrangementet. Dei seks banda var raske med å spela seg gjennom repertoaret, og konserten var over før klokka 22.
– Vi er 16 arrangørar i URO, men det er likevel travelt, spesielt inn mot konsert-start. Men det er både gøy og lærerikt, og det som driv oss er å sjå publikum kosa seg med livemusikk.
Det er førebels ikkje sett dato for neste URO konsert, men URO reknar med at det blir éin til i løpet av 2019.