Fusa trekk seg frå samanslåing

Ordførar Atle Kvåle og Fusa Ap hadde onsdag kveld gruppemøte for å diskutera intensjonsavtalen ordførarane og forhandlingsutvala i Os, Fusa og Tysnes forhandla seg fram til på måndag.

– Konklusjonen var klar. Fusa Ap ønskjer at Fusa skal stå aleine. Det er signal eg har fått frå andre parti òg. Når dei er så sterke og tydelege så reknar eg med at innstillinga frå styringsgruppa, som består av formannskapet og gruppeleiarane som ikkje sit i formannskapet, blir at vi takker nei til intensjonsavtalen og fortset aleine.

– Blir det fleirtalet, så er det eit klart signal. Då er det ikkje lenger eit behov for kommunestyremøte på onsdag. Det er det ikkje grunnlag for, seier Kvåle.

Blei provosert

Kvåle fortel at om gode politiske diskusjonar på gruppemøtet i partiet onsdag, men at dei har blitt provoserte av regjeringa.

– Eg blei provosert av kommuneproposisjonen kor Fusa får 3,1 millionar mindre. Kva signal er det frå regjeringa. Det er i allefall ikkje å legga opp til ei frivilligheit i kommunereforma, når ein skjærer ned på rammebetingelsane for distriktskommunar på den måten.

– Vi sendte allereie i valkampen politiske signal om at vi var veldig skeptiske til kommunereforma, men eg som ordførar har likevel gjort jobben og fått utgreia dette.

Komfortabel med avtale

Fusa-ordføraren fortel at det har vore gode forhandlingar, men at det er den tvang ein opplever frå sentralt hald som gjer at ein no seier nei.

– Eg er komfortabel med det som ligg i intensjonsavtalen. Det har vore gode forhandlingar kor kommunane har vore rause med kvarandre. Det har ikkje med det å gjera.

– Det er vel det vi kallar tvang

Sjølv om Fusa no seier nei, kan likevel resultatet bli ei ny Bjørnafjorden kommune om Fylkesmannen og etterkvart regjeringa meiner det er det beste.

– Kva gjer de om det er det som blir innstillinga frå fylkesmannen?

– På dette tidspunktet er det berre hypotetisk. Men er ikkje det det vi kallar tvang då, spør Kvåle retorisk.

– Vi får eventuelt ta det når den tid kommer, konkluderer Kvåle.

– Nesten ikkje til å tru

Ordførar i Os Terje Søviknes (Frp) er sjokkert over Kvåle og kom onsdag kveld med kraftige uttalelsar mellom anna på facebook.

– Det er nesten ikkje til å tru. Det eg reagerer kraftig på er at då eg snakka med Atle i går kveld etter at dei hadde hatt gruppemøte, så var han ikkje mann nok til å fortelja konklusjonen til meg direkte. Han sa derimot at han kom til å stå på for å køyre prosessen som vi hadde avtalt.

– Det har vore lagt ned masse ressursar i dette frå administrasjonen og politisk nivå. Hadde han ikkje ville dette, så hadde vi ikkje trengt å kaste bort så mykje ressursar. Det er ikkje Os som har vore mest ivrig på å gå i forhandlingar. Det var Fusa som først kom på banen.

– Det er ei ærleg sak å få fleirtalet mot seg, men då kunne han ha sagt det då vi snakka saman i går kveld. Dette er berre falskt av Kvåle, seier Søviknes som vil ha ei rådslaging på formannskapsmøtet i Os i ettermiddag.

– Det er to løp enten å kansellera prosessen eller å køyre den fullt ut. Det er ting som skjer også etter 1. juli då fylkesmannen og regjeringa etter kvart skal seie sitt. Eg føler ikkje det er rett å hoppa av no. Hos oss er det viktig at det er dei folkevalde organa som får seie sitt, ikkje eit parti sitt gruppemøte.

Reagerar på uttalelsane

Om Søviknes sine reaksjoner onsdag kveld seier Kvåle at han har fått med seg Os-ordføraren sine spissformuleringar, at han reagerar på ordbruken og reknar med at Søviknes vil korrigere seg sjølv.

– Eg forventar eit godt samarbeid med nabokommunane også framover, seier Kvåle.