Funnen livlaus i bassenget
Ein mann i 20-åra blei søndag funnen livlaus på botnen av eit av bassenga i Osbadet.
Søndag klokka 12.45 kom melding om drukning i eit av bassenga på Osbadet.
Ein person var funnen livlaus i bassenget.
- Badande gjestar hjelpte til med å få mannen på land. Sånn eg har forstått det så fekk badevertane, som utførte førstehjelp, liv i mannen før ambulansen kom, seier dagleg leiar Leif Gunnar Borgen til midtsiden.no.
Borgen var ikkje på jobb då ulykka skjedde og kom til staden etter at ambulansepersonell hadde overtatt redningsarbeidet.
Han kan ikkje seia eksakt alder på personen, men fortel at det var ein mann, ikkje ein unge, som blei tatt opp av bassenget.
Alvorleg skadd
Mannen blei frakta frå staden i ambulanse.
Haukeland sjukehus melder at mannen i 20-åra er alvorleg, men ikkje kritisk, skadd.
Det er førebels uvisst kva som var årsaka. Ulykka skjedde i 25-metersbassenget.
Politi og helsepersonell rykte ut til Osbadet, som blei stengt etter ulykka. Bassenget skal no vera opna igjen.