Friluftsmann og trebarnsfar

Måndag takka Oddbjørn Dyrdal ja til tilbod om jobb som lensmann i Os.

Les òg: Ny lensmann er tilsett

– Eg fekk tilbodet i førre veke og takka ja per brev i helga, seier Oddbjørn Dyrdal til Midtsiden.

Frå Sør-Trøndelag til Os

Dyrdal var ein av to søkjarar og går frå stillinga som lensmann i Malvik når han i sommar overtar etter Rasmus Dalen, som går av med pensjon.

Malvik kommune ligg ved Trondheimsfjorden, mellom Trondheim og Stjørdal, og har rett over 13.000 innbyggarar.

Før han i 2010 fekk jobben som lensmann i Malvik jobba Dyrdal som politiførstebetjent og NK ved Selbu og Tydal lensmannskontor.

Han hadde då jobba i nesten 10 år i heimbygda Selbu, der han framleis bur.

– No ser eg fram til å flytta til Bergen, og til å jobba i Os, seier Oddbjørn Dyrdal til Midtsiden.

Med son i bergenspolitiet

Den komande lensmannen i Os er far til tre. 

– Eg har ein son og to døtre, yngstejenta er 13 år, dei to andre er over 20. Sonen min jobbar som politi i Bergen.

Kjærleiken var viktigaste årsak til at han ville flytta på seg.

– Eg har kjæraste i Bergen, og har pendla ein del i det siste. Så er det sånn med forhold, at ein kjem til ein fase der det blir snakk om kvar vi skal bu, og då stillinga på Os blei lyst ut så passa det veldig bra.

– Sprek og populær

Redaktør i lokalradioen, Nea Radio, fortel om ein populær og sprek lensmann som er på veg til Os.

– Oddbjørn er ein flink og løysingsorientert mann, ein utadvendt og samansett fyr som har spelt i band og er veldig opptatt av idrett, seier Andreas Reitan.

– Han er ein god langrennsløper og har vore ivrig innan handball, der han har følgt opp eldstedottera som har spelt på toppserielaget Selbu, fortel radioredaktør Reitan.

Den komande lensmannen seier at han på fritida er interessert i idrett og friluftsliv.

– Eg har eit godt inntrykk av Os og ser fram til turar i fjella i Os og Bergen, seier Oddbjørn Dyrdal.

Dalen går av med pensjon 1. juni. Det er førebels ikkje bestemt kva dato Dyrdal skal vera på plass på kontoret i Irisgården.