Frå USA til Os med hip hop
I helga kan du få dansa med nokre av dei råaste jentene innan hip hop når Schang kjem til Os. – Kaya kjem rett frå USA med mange nye moves, reklamerar Veronica Halhjem.
Veronica Halhjem tok i januar initiativet til å starta breakdance-kurs med Hans Christian Andersen frå Absence Crew på Kuhnletunet. No inviterar ho til helgeworkshop med fire av dei råaste hip hop-jentene i Noreg.
– Laurdag og sundag kjem jentene frå Schang Dance Productions til Sprek og Blid for å læra bort dei siste movesa, fortel Veronica Søilen Halhjem.
Jentene er det einaste profesjonelle dansecrewet i Bergen som består av berre jenter. På merittlista har dei mellom anna finalen i Dansefeber på TV Norge, opptredner og koreografi på show som TV2 sitt 20-årsjubileum, TV-aksjonen 2010 og Det store korslaget.
– Jentene har òg dansa med artistar som Vinni og Lars Vaular, fortel den energiske arrangøren.
Ope òg for gutar
Sjølv om Schang er ei rein jentegruppe forsikrar Marit Hagen Halvorsen i gruppa at kursa også passar, og er opne for, gutar.
– Dei passar for alle som har dansa litt før.
– Vi kjem til å køyre eit semi-avansert nivå, kor vi går roleg gjennom bevegelsane og stega.
– Det kjem garantert til å bli gøy og lærerikt, smiler dansaren.
Show sundag
Kvar av dei to dagane blir det tre økter.
– Sundagen kjem vi til å køyra eit lite danseshow før den siste klassen omlag klokka 15.35, så då er det berre å ta turen.
Gruppa tel eigentleg seks jenter, men med ei i morspermisjon og ei sjukemeldt blir dei fire på Os i helga.