Frå toppen til floppen?

I fjor blei det både deltakarrekord og ny løyperekord i Liafjellet Opp.

Sjå bildeserie og resultatliste frå Liafjellet Opp 2012.

I 2012 var det 30 deltakarar i turklassen og 115 i konkurranseklassen, blant dei var sju tilsette i Tiriltoppen barnehage, som var den bedrifta med flest deltakarar i fjor.

Liafjellet Opp er cirka 1.480 meter, frå Nore Neset Aktivitetshuse (56 moh) til Storevarden på Liafjellet (259 moh), altså ein høgdeforskjell på 203 meter.

Årets Liafjellet Opp blir arrangert under Nore Neset Dagane og Osmesso, laurdag 21. september.

Fekk dikt som svar

Til årets løp har fjorårsvinnar Tiriltoppen utfordra ein barnehage i Os.

– Det er litt kjedeleg at Bergen har den barnehagen som har raskast tid, flest påmeldte og som i år skal slå rekorden, skriv dagleg leiar i Tiriltoppen, Ole Christian Borge, i ein epost til Marielle Aanes, leiar i Kulur Kuvågen barnehage.

Han fekk eit saftig svar på utfordringa – på rim:

Hei, Ole Christian

Du tøffer deg nå
Men hva venter du på
Burde ikke du vært ute trent
Liafjellet opp – det blir ikke pent

Vi er klar for å ta over rekorden
Bare vent til du får se Kuvågen-horden
Vi skal knuse dere i Tiriltoppen
Eller var det TirilFLOPPEN?

Vi skal ta godt imot dere på toppen Ole Christian☺

Marielle Aanes Møgster
Kulur Kuvågen barnehage

Med dette er det duka for ekstra prestisje i bedriftsklassen i år, og kanskje har utfordringa dei to "konkurrentane" imellom smitteeffekt på andre bedrifter i Os?

Dei tre raskaste frå kvar bedrift blir lagt saman og delt på tre. Nytt i 2013 er at det blir trekt frå 5 sekund på snitt-tida per deltakar bedrifta har utover sine tre raskaste løparar. Det er ikkje tak på kor mange kvar bedrift kan stilla med.