Frå små stiar til store anlegg

Kommunen har starta arbeidet med å utarbeida ein ny kommunedelplan for fysisk aktivitet, idrett og friluftsliv for den komande åtteårsperioden. Styrings- og arbeidsgruppe med representantar frå politikken, administrasjonen og dei frivillige laga er allereie etablert og i gang.

- Mange av ønskja frå idrettslaga har vi god oversikt over, men planen skal ikkje berre omfatta desse.

- Like viktig er lokale nærmiljøanlegg som grendalag og velforeningar ønskjer seg, eller den litt ukjende stien som treng opprusting, fortel idrettskonsulent Tom Leonsen i Os kommune.

Saman med politisk representant Eirik André Hesthamar inviterer han til folkemøte på Nore Neset Aktivitetshus torsdag 29. mars klokka 18.00.

Mest mogleg input

Folkemøtet er ope for alle, ikkje berre dei etablerte lag og organisasjonane, men også nabolag, velforeninger og enkeltpersonar som har innspel i forhold til kva og kor det trengs å gjera noko.

- Vi ønskjer å få eit breiast mogleg grunnlag for planen. Difor er ingen innspel for små og ingen innspel for store.

- Kva er behova dei forskjellege stadane i bygda? undrar Hesthamar.

- Målgruppane for planen er alle frå dei som er på trilletur med ungar via idrettslag, og andre organiserte aktivitetar, til eldre og andre som berre vil gå på tur.

- Skal kunne hake av

Dei to håper og trur dei skal klara å arbeida fram ein plan som ikkje berre blir eit skrivebordsprodukt, men eit arbeidsverktøy dei kan bruka i prioriteringer også når andre areal- og reguleringsplanar skal behandlast.

- Det er viktig at vi får ein god plan som famnar breiast mogleg innan alle aktivitetar som handlar om fysisk fostring.

- Dette kan bidra til at vi kan vera i forkant og settje av areal til fysisk aktivitet når andre kommuneplanar skal handsamast, forklarer Leonsen.

- Mi oppgåve blir å forankra det inn i dei politiske organa slik at vi gjer dei riktige prioriteringene politisk. Målet er at planen blir så konkret og god at vi etter endt periode berre kan huka av for dei tiltaka vi har gjennomført, seier Eirik André Hesthamar.

Tilskot finnest

Fleire innan organisert idrett har kritisert kommunen for ikkje bidra nok til drift og utvikling av anlegg.

- Det er klart at kommunen har begrensa med midlar å bruka til dette. Men ein godt gjennomarbeida plan vil gjera det enklare for oss som politikarar å setja dette på dagsorden og ta det med i dei politiske prioriteringene.

- I tillegg skal vi ikkje gløyma at det finnest mange tilskot frå eksterne organ, både i det offentlege og i næringslivet. Ressursen vi har i Tom er så viktig for å finna og utløysa desse midla i samarbeid med dei frivillige.

- Eg er utruleg glad for at kommunen har ein så dyktig mann som Tom, skryt Hesthamar, som i tillegg til å vera politisk involvert også har fått nytta seg av Leonsen si kompetanse då han var prosjektleiar for bygging av kunstgrasbane i Øyane.

- Visste du forresten at dugnadsinnsatsen blir rekna som del av finansieringa når ein søkjer tilskot? Får du god kompetent hjelp er det mykje som kan realiserast, og det treng ikkje alltid ta så lang tid heller, avsluttar Hesthamar.