Frå Øystese til Os

I førre veke blei det kjent at Os har signert Austevoll sin toppskårar i år, 22 år gamle Kristoffer Østervold.

I dag signerte ein annan austevolling, Øystese-spelar Marius Haugland Mikkelsen (21), med Os.

– Han får ekstremt gode attestar, både på eigenskapane hans og på han som type, seier sporssjef Lars Bakkerud.

Marius speler midtbane, men har også vore brukt som midtstoppar.

– Eg har sjølv spelt futsal med Marius. Han er både duellsterk og har eit veldig godt overblikk. Det blir ein stor styrke for oss å ha han med, seier Endre Brenne, som sjølv nyleg kom tilbake til Os.

Studerer idrett i Bergen

Marius har spelt fleire målrike kampar mot Os, både då han med Austevoll slo Os ut av NM med 4-6 etter ekstraomgangar på Kuventræ i fjor og då han med Øystese tapte 4-3 i ein dramatisk kamp på same bane i serien i år.

– Då Endre tok kontakt og han og Bakkerud presenterte opplegget dei har på gang her på Kuventræ så bestemte eg meg, fortel Marius.

Han har vakse opp på Huftarøy og spelt for Austevoll til han som 15-åring byrja på vidaregåande skule i Norheimsund.

Frå Norheimsund gjekk turen vidare til Molde, for å spela med Molde 2, men mesteparten av opphaldet blei øydelagt av kneskade. Tilbake i Hordaland spelte han med Austevoll i fjor og med Øystese i år.

Øystese landa på plassen bak Os med eitt poeng mindre i årets sesong. Marius spelte så og seia alle kampane frå han i mai var skadefri.

– No gler eg meg til neste veke og første trening med Os, seier Marius, som studerer idrett på Høgskolen i Bergen.

– Det kjem fleire spelarar

Bakkerud seier alle frå årets stall, med unntak av kaptein Stian Lunde, er med vidare i 2015. I tillegg har Os styrka stallen med Brenne, Østervoll og no Mikkelsen.

– Kor mange fleire kan koma inn i stallen før 2015?

– Det kjem nok to til. Vi treng éin til i sentrallinja og så ser eg for meg å styrka back eller kant med éin ekstra spelar, seier Bakkerud.

Os skåra som kjent desidert mest i avdelinga i år (74 mål), men sleppte også inn flest (66 mål).