Forsterka tiltak for skule og barnehage

Fredag kom Bjørnafjorden med ei ny, lokal forskrift.

Les ògNy forskrift er klar: Gjeld frå klokka 12 i dag

Same dag fortalte kommunen om forsterka tiltak for skular og barnehagar.

Det er stort sjukefråvær blant både store og små i barnehagane og skulane våre, og behov for forsterka tiltak.

Tiltaka gjeld frå i dag, 13. desember.

Nasjonalt er det beslutta å gjeninnføra trafikklysmodellen. Barnehagane og skulane i Bjørnafjorden kommune er på grønt nivå med nokre forsterka tiltak.

Forsterka tiltak for barnehagane og skulane:

• Når du leverer og hentar barn i barnehagen eller på skulen/SFO skal du nytte munnbind. Dette er eit påbod etter lokal smittevernforskrift.
• Forsterka reinhald frå måndag 13. desember.
• Av omsyn til forsvarleg drift og sikkerheit, kan barnehagane og SFO ha redusert opningstid. (Dersom dette blir aktuelt, får du direkte beskjed om dette frå barnehagen eller skulen.)

For skule:

Ved stort fråvær blant tilsette og barn eller ved auka smitte, kan enkelte trinn gå over til digital heimeundervisning. Dersom dette blir aktuelt, får du beskjed direkte frå skulen.

– Bør ikkje trena med dei frå andre klassar

Kommunalkriseleiing kjem også med ei anbefaling som handlar om fritida til ungane.

– Det er både viktig og sunt for barn å vera aktive og delta i organiserte aktivitetar, seier assisterande kommuneoverlege, Jonas Nordvik Dale.

Men å trena saman med dei du ikkje går i klasse med, blir ikkje anbefalt.

– Med den smittesituasjonen vi ser no, vil eg anbefala lag og organisasjonar å ta juleferie frå treningar og liknande for barn frå ulike klassar og skular.