Første release på to år
Etter ein travel festivalsommar er Orbo ute med ny singel. – Dei kjem tettare i tida framover, lover musikaren.
Med bandet The Longshots og som låtskrivar og produsent har det blitt tre Spellemannprisar på Ole Reinert Berg-Olsen (35). «Praire Sun» (2011) kom på lisene i USA, også norske «Steingard» (2013) fekk han positiv merksemd for.
Dei siste åra har det handla mest om familie, festival og arbeid for seg sjølv og andre i eige studio (Hordaland Studio) for den produktive musikaren Ole Reinert Berg-Olsen (35). Førre singel, «Sands of Time», kom i november 2015.
– Eg har fått skrive ein del og det vil koma fleire singels-slepp utover hausten og vinteren, seier Ole Reinert til Midtsiden.
Fredag morgon var det release på låten «Here she comes», ein frisk vorspiel-melodi med potensiale for å bli kalla sommarlåt.
– Kven er det som kjem, er det kona eller dottera?
– Det er ikkje så bokstavleg. Låten handlar om at det kan dukka opp ting du ikkje er førebudd på, og då gjeld det å kasta seg rundt.
Ekstern produsent
Orbo er framleis under Grappa Musikkforlag, men denne singelen er gjeven ut av Drabant. Ole har produsert sin eigen musikk til no, men til denne har han fått hjelp.
– Drabant sette meg i kontakt med Bjarne Stensli, som blant anna har jobba med Sivert Høyem og A-ha. Det var fantastisk å bli produsert, det å ha ein ny «take» på tingene, spesielt på vokal.
– Bjarne er dessutan trommis, og eg liker ekstra godt å ha ein trommespelar som samtalepartnar når det kjem til produksjon.
Om det blir eit album, og kor tid det kjem, er førebels ikkje bestemt.
– Det er litt som det var på 50-talet no, med fokus på éin og éin låt, som til slutt blir eit album. Både eg og Drabant er glade i vinyl, og sjansane er nok der for at det kjem eit album på vinyl når vi har fleire singlar ute.
Festivalsommar med Gina
Den eine Spellemannprisen har Ole vunne som produsent av Gina Aspenes sitt debutalbum, «Innertia». I år har duoen selt seg inn saman til ei rekkje festivalar.
– Eg var på Notodden åleine, elles spelte eg mykje med Gina i sommar, både på Tysnesfest og i Skånevik. Det blei i alt 5-6 festivalar.
– Korleis ser hausten ut?
– Eg speler faktisk i Bergen søndag, på «Ymse». Men det blir nok meir tid i studio i haust, så får vi koma oss ut igjen i felten frå vinteren og våren av.
• Midtsiden samleside: ORBO