Første gong "heimefrå"

I kjellaren på Oseana er det høg aktivitet om dagen. Greigutstillinga skal fornyast og dei fleste bileta byttast ut. Samstundes skjer det ei forvandling i rommet innanfor kor dei to bildekunstnarane Ragnhild Willumsen og Anne Grete Istad riggar seg til i Hvelvet.

– Det er veldig spennande. Dette er første gongen vi syner bileta utanfor atelieet vår, fortel Ragnhild Willumsen.

Dei to kunstarane har dei seinast åra drive Atelier 20A saman i Bergen.

Frå Spook og språk til lerret

Istad er utdanna frå Rogaland Fylkeshudflidskule og har arbeidd som strikkedesignar for fleire store bedrifter, som Dale Ullvarefabrikk og Rauma Ullvarefabrikk. Ho har òg strikka for Per Spook.

Willumsen er eigentleg utdanna språkforskar, men har drive malinga på hobbybasis fram til 2007 då ho gjorde det til ein heiltidsgesjeft.

– Eg har alltid likt å teikna og male, men med fire born blei det ikkje alltid tid til det.

– Difor bestemte eg meg etterkvart at eg ville freiste å ta hobbyen og gjera den til eit levebrød, forklarar Willumsen.

Måtte bli på landet

At dei to legg si første utstilling utanfor atelieet til nettopp Os og Oseana er ikkje tilfeldig.

– Eg er oppvaksen på landet og har opp gjennom åra blitt glad i Os, fortel Willumsen som har blitt knytt til bygda gjennom svigerfamilien.

– Det trur eg kanskje bileta mine speglar med landlege motiv og eit rustikk uttrykk.

Medan Willumsen arbeider med akryl på lerret, nyttar Istad fleire teknikkar henta frå tekstilkunsten kor ho nyttar tekstiler, broderier og andre materialer for å få fram strukturar i bileta.