– Forelska med éin gong

Som produksjons- og formidlingssjef i Bergen Filharmoniske Orkester (BFO) har Lindeberg vore med rundt Oseana heilt sidan kunst- og kulturhuset reiste seg frå tomta på Mobergsneset.

– Vi blei invitert med då huset blei planlagt for å koma med innspel og ønskje sett frå orkesteret si side.

– Allereie første gong eg kom ut på neset her forelska eg meg heilt i fjorden, fjella og plassen, seier den nytilsette direktøren då Midtsiden møtte han på ein av dei mange visittane det har blitt sidan han fekk tilbod om jobben rett før jul.

– Eg trur det knapt kan finnast betre måte å henta seg inn igjen i ein hektisk kvardag, enn å ta seg fem minutt på terrassen her og berre sjå på fjorden og fjella, seier Lindeberg, som trur han får testa teorien i tida som kjem.

Søkte ikkje

Lindeberg registrerte at stillinga var blitt ledig i fjor haust og gjekk i tenkeboksen på om han skulle søka.

– Firmaet som kommunen brukte i samband med utlysinga kom meg i forkjøpet og lurte på om eg var interessert i å ta ein prat om jobben.

Les òg: Her er den nye Oseana-sjefen

– Då eg allereie hadde tenkt tanken var det ikkje vanskeleg å takka ja til samtalen, og etter kvart til stillinga, då eg fekk tilbodet, fortel Lindeberg.

Eit enormt potensiale

Det er ein nytilsett direktør som er full av entusiasme for huset han no skal leia.

– Ein av grunnane til at eg hadde lyst på jobben var dei moglegheitane huset gjev. Det har eit enormt potensiale.

– I tillegg hadde eg eit svært godt inntrykk av staben her ute. Når eg har snakka med folk i bransjen som har vore her, så skryt dei uhemma av korleis dei blir mottatt og kor bra Oseana-drifta er organisert.

– Seinast Lisa Williams, som var her på fredag, kom med mykje ros. Det var det desidert beste huset ho hadde vore i så langt på turneen, fortel Lindeberg.

Gav seg tidleg

Lindeberg er sjølv utdanna som fiolinist frå Guildhall School of music and drama i London.

– Blir det eksklusive fiolinkonsertar på kontoret no då?

– He, he! Nei, eg gav meg som utøvande musikar for 12 år sidan etter nokre år som frilans.

– Eg kom vel til den konklusjonen at dette ikkje var mi greie og at eg i staden var ein administrator som ville spela på fleire strengar.

– Det var ei tøff avgjerd å ta som 26-åring, men eg meiner den dag i dag den var rett, seier ein ærleg Lindeberg.

Fantastiske reiser

Lindeberg skildrar tida etter at han la fiolinen ned i kofferten for godt som ei tid med fleire fantastiske reiser.

– Eg har gått i gode skular, mellom anna hos Stein Henriksen i BIT20 Ensemblet, og i dei andre institusjonane eg har jobba ved.

– Faktisk har eg no halde hus i 10 år i Grieghallen, dei siste fem åra med BFO, fortel Lindeberg.

Skal vera eit kraftsenter

Som produksjons- og formidlingssjef for BFO har Lindeberg vore opptatt av skule, formidling og born.

– Oseana skal vera eit kraftsenter og ha noko for alle, slår Lindeberg fast, i det einaste som kan likna ei programerklæring.

– Du har gjerne fått med deg diskusjonane både rundt kulturskulen og leigetilhøva for dei frivillige laga i bygda. Har du gjort deg nokre tankar om dette?

– Eg har registrert at det har vore noko der ja, men har ikkje lyst til å kommentera det noko nærmare enno.

– No skal eg først gå i ein god dialog med det som finst av aktivitetar i Osbygda, med ressurspersonar og andre, så får vi sjå kva som kjem ut av det.

– Eg har masse idear og tankar, men vil snakka med andre først.

Imponert over frivilligheiten

I tillegg til sjølve huset og plasseringa ved fjorden er det særleg éin ting som har imponert den nye direktøren stort.

– Det frivilligheitsnivået som er her på huset er unikt. Eg har ikkje vore borti plassar kor frivillige stiller opp slik som dei gjer her.

– Det skal vi ta vare på og visa at vi sett pris på, avsluttar Ole Tobias Lindeberg, som no tar påskeferie før han tar til som Oseana-direktør 2. april.

Dette er Ole Tobias Lindeberg

• 38 år, gift, busett på Paradis.
• Opprinneleg frå Stavanger, men har ei dialekt prega av slekta på Sørlandet.
• Utdanna fiolinist frå London, tatt administrasjon og leiing ved Norges Musikkhøgskole og Universitetet i Oslo.
• Kjem frå stillinga som produksjons- og formidlingssjef ved Bergen Filharmoniske Orkester.