Førar tigga pengar - eigar leitar etter limoen
Limousinen som onsdag morgon blei stoppa med rusa førar fekk ein trøblete tur heim. Eigar leitar no etter bilen sin i Sandnes.
Onsdag morgon blei ein limousin stoppa på Halhjemsvegen med ein full sjåfør utan førarkort.
Les òg: Rusa på champagne?
Eigaren fortel at han ikkje veit kven som har kjørt limousinen eller kvar den er no.
Negativ reklame
– Eg har fått nokre tips om at den er sett i Sandnes-området, og kjører no rundt og leitar etter den, seier David Eik Henriksen til Midtsiden.no.
Eik Henriksen driv SMS-tenesta "Lasermannen" og kjøpte limousinen, ein 97-modell Ford Lincoln, for to år sidan.
– Eg bruker bilen som eit rullande reklameskilt for tenesta eg driv. Det er ikkje denne forma for merksemd eg hadde håpa på, seier han.
Tigga pengar til ferja
Føraren, som var mistenkt for kjøring utan lappen, men med promille, blei dimittert etter avhøyr. Med seg hadde han ein passasjer, truleg ein som ikkje har betalt for å sitja i limoen.
For i går ettermiddag tok dei med seg bilen og kjørte om bord på ferja frå Halhjem til Sandvikvåg.
Men han løyste ikkje billett.
«Kan du som kjører en syv meter lang gull-limousin være vennlig og komme til billettluken nå», blei det til slutt ropt opp over høgttalaranlegget, ifølgje BA.no.
Føraren hadde då meldt seg og sagt at han ikkje hadde pengar. Men så starta han ein innsamlingsaksjon på ferja, for å skaffa pengar til billetten.
Han skal blant anna ha tigga pengar av eldre damer.
– Veit ikkje kven som kjører eller kvar bilen er
Eigar Eik Henriksen kjører i skrivande stund rundt i Sandnes for å leita etter limoen.
– Han som lånte bilen har lappen, men han ringte meg og sa at han hadde hamna på fest og ikkje visste kvar bilen var.
– Det er ikkje han som har kjørt den, men det er siste gong han får låna noko av meg, forsikrar David.
No har han høyrt rykte om at bilen er tilbake i Sandnes, men har ikkje eksakt adresse. Nøklane har han heller ikkje fått.
– Eg svingte nett innom ein plass, men der var han ikkje. Bilen såg ut til å ha fått seg ein bulk på bilda du hadde tatt, eg får håpa den ikkje er så veldig skadd når eg finn den igjen.
Eik Henriksen fortel at bilen har stått 10 år i Noreg og at den han vore lite brukt. Sjølv har han eigd bilen i to år og vurderer å selja den.