Fonos inntar Ole Bull Scene

Etter nokre år med hektisk aktivitet, tenkte dirigent Stine Kobbeltvedt at medlemmane i koret Fonos no var slitne og ønskte å ta det litt med ro.

– Eg spurte dei om vi skulle droppa dei store konsertane dette semesteret, men eg blei overraska, for det ville dei ikkje, ler Stine.

Då var det berre å køyre på, og då dei fekk spørsmål om dei ville setja opp ein konsert på Ole Bull Scene i Bergen takka dei til slutt ja.

– Vi måtte tenkja oss om, det er jo litt skummelt å bevege seg utanfor dei trygge rammene her i Os.

Ingen Oseana-konsert i år

Sommarkonsertane til Fonos har vore veldig populære, men dette året blir det ikkje sommarkonsert i Oseana.

Sjå video frå showkonserten med Fonos og Mix Master Cru sommaren 2015.

– Det er store utgifter med konsertar så vi kan ikkje gjera begge deler. Vi liker oss veldig godt i Oseana, men det er viktig å utfordra oss sjølv litt òg.

Fonos har fått seg ei engasjert og lojal tilhengjarskare opp gjennom åra og Stine er spent på korleis dei vil respondera på konsert i nabokommunen.

– Eg håper dei ikkje blir skuffa og at dei blir med oss til by’n.

Det beste av Fonos

Konserten på Ole Bull har dei kalla «Best of Fonos» og vil vera ei samansetjing av låtar dei har sunge tidlegare år – i tillegg til nokre dei nye.

– «Best of» var i starten berre ein arbeidstittel, men så tenkte vi at når vi først har våga oss ut av bygda så kanskje dette var ein tittel bergensarane kan bli nysgjerrige på.

Låtane er valt ut på bakgrunn av kva medlemmane har likt å synga, men også låtar som publikum har likt ekstra godt.

– Denne gong vil det berre vera oss på scenen, i tillegg til vårt faste band. Vi har jo samarbeidd ein del med andre, men vi har så utrulig mange gode solistar, så det er viktig at dei får vist seg fram òg.

Til Fusa for å øva

Denne helga reiser gjengen til Fusa på øvings- og sosialhelg.

– Det er viktig å gjera andre ting saman i tillegg til å øva, så det blir veldig kjekt.

Billettane til konserten blei lagt ut i går og Stine er veldig spent på korleis det går.

– Alt er nytt for oss og vi aner faktisk ikkje korleis det kjem til å gå. Men vi håper at folk i Os blir med oss og at vi får oss ein skikkelig festaftan saman.