Flyktar heim til Os

For eit drygt år sidan starta osingen Jon Hægland eigen standup-klubb i Os.

I april i fjor sto blant anna Ole Soo og Stian Blipp på scenen på Irish Cat, påskeaftan er det klubbkveld igjen, og då er osingen Håvard Nyhagen Henriksen ein av kveldens fire komikarar.

– Håvard er første osing etter meg som står på scenen i Bergen med jamne mellomrom. Han er ganske fersk, men har fartstid frå improvisasjonsteater, er ein av Bergens få "absurdistar", og absolutt verdt å få med seg, seier Jon.

– Trengte å bli meir spontan

Håvard har vakse opp i Søre Øyane, men bur no i Bergen der han jobbar som lærarvikar ved ein vidaregåande skule.

Det var ei venninne som for tre år sidan fekk han med på impro-teater for første gong.

– Eg er ein som alltid har hatt ein tendens til å tenkja meg lenge om før eg gjer noko.

– Eg ville sjå om eg kunne bli meir spontan og blei med på teater.

To år med standup

Etter eitt år med impro-teater supplerte Håvard scenekunst-hobbyen med standup.

– På impro-teater har du ein viss plan, det er struktur på starten, rollene blir presentert, og så er det i gang utan at du veit kva veg det skal ta.

– På standup er det langt meir planlegging, ofte ned til kvart minste ord.

Dei første vitsane til Håvard handla blant anna om tryggleikskontrollen på flyplassar - og om kor fint det er i Hiroshima.

Litt rar

– Vitsane mine tar ofte form rundt ein rar tanke eg har. Eg har også fått høyra at eg er litt rar, seier Henriksen, som spelte rømt psykiatrisk pasient i ein musikkvideo av Fjorden Baby! i 2012.

I vinter har han blant anna vore på humor-lab ein del og sto blant anna rett før Bård Tufte Johansen på Ricks for ein god månad sidan.

– Då var det heilt vill stemning. Men eg har høyrt mykje positivt om publikummet på Os òg, så eg ser fram til å stå på Irish Cat på laurdag