Flott friidrettshelg på Kuventræ
Oslekene 2020 vart arrangert på Kuventræ denne helga.
Bildeserie:
Oslekene er eit årleg arrangement som blir arrangert i regi av Os Turnforening.
Arrangementet er for utøvarar frå rekruttalder (7-8 år) til 19 år.
• Les òg: Jan Norvald Borgen overraska med ærespris.
Ei skikkeleg flott helg
Med knallvêr og flotte forhold var det ingenting å utsetja på helgas arrangement.
– Dette gjekk veldig bra, og det har vore ei skikkeleg flott helg, seier Åge Gulbrandsøy frå Os Turn.
– Vi starta på fredagen og avslutta på søndagen. Totalt har vi hatt 269 utøvarar i sving denne helga og det er jo veldig kjekt,
Til tross for koronareglar og lokale restriksjonar valde klubben å arrangera med utøvarar frå Bergen.
– Vi hadde ein diskusjon på dette og fann ut at vi fylte dei ulike kriteria som gjorde at dette ville gå bra. Vi er utandørs, og vi driv ikkje med kontaktidrett.
Første og siste i 2020
Det har vore eit spesielt år for mange, og det er ingen unntak for friidretten. Dette var det første arrangementet til Os Turn, og det ser ikkje ut til at det vil bli arrangert fleire stemne for denne aldersgruppa i 2020.
– Det har vore mange løp og stemne som har blitt kansellert i år. Dette vart vårt første arrangement for året, og det blir det siste også. Vi skal ha eit arrangement neste helg, men det er kretsmeisterskap for seniorar, påpeikar Gulbrandsøy.
Men trass i få arrangement dette året, ser klubben lyst på vekst i eigen klubb.
– Det ser bra ut om dagen, det er ei flott og jamn rekruttering i klubben, og det er vi veldig glad for. Det har vore eit flott opplegg på treningsfeltet.
