Fleire turområde prega av menneskeavføring
– Folk trør i skiten og hundar spring rundt med brukt dopapir i kjeften, fortel fortvilt turgåar.
Bildeserie:
Ein turgåar har kontakta Midtsiden-redaksjonen etter å ha irritert seg over funn av dopapir og menneskeavføring i fleire turområde.
– No når det er fint vêr er det tyedlegvis mange som er på tur, og ein del som også søv ute. Det ser ut som om fleire av desse er uerfarne friluftsfolk, ungdomar og vaksne som ligg med dyne og pute under open himmel, i staden for i sovepose og jervenduk.
Men det er ikkje sovefasilitetane som bryr turgåaren, som ønskjer å vera anonym - det er do-vanene.
Sist var på ein tur denne veka, på «baksida» av Sveningen, på den gamle militærvegen i Brekkedalen, frå Haugsdal til Rolvsvåg.
– Både på stien og på fine plassar å ta pause ligg det menneskeavføring. I buskar og tre heng det dopapir. Eg forstår at det er irriterande med hundeskit og posar med skit, som enkelte ikkje tar med seg, men det er ikkje særleg delikat med menneskeavføring heller.
– Når det heng dopapir i buskane er det dessutan noko som kan tiltrekka seg hundar, som kan byrja å snusa eller sleike på dette, eller ta det med seg i kjeften.
– Ta med eller grav ned!
Innringar sitt råd er at folk anten tar med spade, pose eller kjem seg eit godt stykke vekk frå sti og rasteplass - og legg mose eller nokre steinar over både avføring og papir.
– Du får kjøpa små, bærbare toalett med posar, «BioBag». På same måte som du tar med deg avføring for hund kan du fint ta med din eigen.
Om du ikkje har tilsvarande utstyr bør du dekka avføringa og papiret på anna vis.
– Ta med ein liten feltspade og grav ei lita grop, slik folk på øving i Forsvaret gjer. Er du på fjellet, at det er vanskeleg å grava, så kan du dekka over «saka di» med nokre steinar.
– Sånn det er no, med papir i buskane og drit over alt, kan vi ikkje ha det!