Fleire nye butikkar på AMFI Os
Éin legg ned, éin har nyopning, éin flyttar på seg og fire lokale står ledige. – Men vi er nesten i boks med to nye leigetakarar, seier Anne Kristine Tøsdal.
Den siste tida har det vore litt ombygging i delar av førsteetasjen på Amfisenteret.
Torsdag 30. mai hadde Eurospar omprofilering til Spar, med ny inngang mot Notabene og MX Sport.
– Dei har fått ein fin butikk og har fått mange gode tilbakemeldingar, seier senterleiar Anne Kristine Tøsdal.
Nyopning av Gullsmed Eide
Då Eurospar snudde på seg blei det samtdig bygd fire nye mindre butikklokale.
Eitt av desse skal husa Gullsmed Eide, som flyttar seg nokre meter nærmare heisen.
Eide har nyopning torsdag i neste veke.
Senterkiosken legg ned
Senterkiosken har varsla at dei vil legga ned, og stenger dørene no i sommar.
– Floriss er interessert i lokalet og flyttar på seg når kiosken er rydda ut, fortel Tøsdal.
Fleire nye butikkar
Ved sidan av Eide kjem det tre nye lokale. I tillegg blir lokalet der Floriss er i dag, ståande ledig.
– Vi har fleire interessentar på desse lokala, og er nesten i boks med to av dei.
Senterleiaren held korta tett til brystet når det kjem til kven dette er. Ho vil heller ikkje ut med bransje.
– Men om alt går som det no ser ut som, kan AMFI Os få to nye butikkar allereie rett over ferien, seier Anne Kristine Tøsdal.