– Flammar og heile pakka!
Fredag kan du få med deg eit show du ikkje har sett makan til i Os kyrkja når TX Vikings held show med flammar, knuser murstein med hovudet og fortel si historie.
Gutane i TX Vikings kan sjå skremmande ut når du møter dei på busshaldeplassen på Osøyro ein torsdag ettermiddag, men bak den kraftige fasaden skjular det seg reflekterte gutar med eit klart bodskap.
- Vi er alle x-kriminelle som har vore borti narkotika, vinnings- og valdskriminalitet, men som har kome på betre tankar, fortel Marius "Babyface" Willumsen som saman med Kai Roger "Jaws" Strøm Case og Jan Ivar "Southern Warrior" Sundstøl er ute for å promotera morgondagens show i Oskyrkja.
Eit sirkus
- Vi er som eit sirkus, og kan lova ei salig blanding med flammar, knusing av murstein med hovudet, bøying av jernstenger og mykje progressiv musikk.
- Du er ikkje redd kyrkja skal brenne ned då, spør vi Einar Ekis Ekerhovd som er vertskap for gutane.
- Nei da. Vi har da hatt show i kyrkja før, smilar Ekis, som har full tiltru til at gutane kjem til å levera både eit spektakulært show og ta vare på kyrkja.
Frå VM og OL til Os
Dei sju gutane som skal på scena i morgon er vante med turnélivet.
- Denne gongen er det Os og Osterøy som står på programmet. Seinare i vår blir det tur til både Georgia og Armenia, Finnsnes og Lofoten, fortel Kai Roger.
Showet, som dei starta med på midten av 2000-talet, har dei òg vore i England med under OL i fjor sommar og tidlegare på VM i Ishockey. Her heime er det truleg mest kjende frå Norske Talenter på TV2.
- Der blei vi invitert til å vera med fordi TV2 ønskja å få ei større bredde i programmet, forklarar Marius før han legg til at historia om TX Vikings er i ferd med å bli ein dokumentar som kjem på TV til hausten.
Sterke historiar
Dei tre kraftkarane har alle sterke historier bak seg.
- Det er dei historiane vi har lyst til å dela med ungdom og unge vaksne i 15-35 årsalderen i morgon, i tillegg til å laga show.
- Heile konseptet vårt handlar om å forebygga rus, mobbing og doping, forklarar Marius som saman med dei andre gjerne blir brukt av politiet, psykiatrien og sosialtenesta for å hjelpe personar som har kome feil ut, med å koma på rett kjøl att.
- Det kan gjerne vera lettare å prate med nokon som har vore i same situasjon sjølv, enn med dei offentlege mynda.