Fjellheim - ein sprek 75-åring

26. februar 2011 var det 100 år sidan første Fjellheim blei bygd.

Les òg: Gratulerer med dagen, Fjellheim!

I dag er det 75 år sidan Fjellheim, omtrent sånn bygningen framstår i dag, blei reist igjen etter at første Fjellheim brann ned.

Under følgjer innsendt bidrag av Tore Moberg:

Laurdag 5. februar 1938 vart Fjellheim innvigd med ein opningsfest som det gjekk gjetord om i mange år etterpå. Os Musikk-og Turnforening hadde fått reist eitt av dei flottaste forsamlingshusa på Vestlandet.

Fjellheimbrannen og nytt hus

Opptakten til det noverande Fjellheimbygget var ikkje enkel. I 1936 var ei større ombygging av gamle Fjellheim teikna ferdig av arkitekt Johan Lindstrøm, og arbeidet skulle ut på anbod. Kort tid etterpå, nærare bestemt natt til søndag 30. august, brann huset ned til grunnen. Det kom som eit sjokk på foreiningane, men dei var ikkje rådlause.

Byggekomiteen for ombygginga fekk no eit heilt anna oppdrag, og det same fekk arkitekten. Branntomta vart rydda, og brukande material vart kjørt til Kuventræ. Det første klubbhuset der lukta visstnok svidd i fleire år etterpå. Turnforeningen hadde berre nokre månadar tidlegare opna det første anlegget på Kuventræ, og var nokså nedsylta i gjeld.

Kort tid etter brannen hadde arkitekt Lindstrøm laga utkast til teikningar av eitt nytt Fjellheimbygg, denne gong i mur.

For å gjera ei lang historie kort: Knapt eitt år etter det første spadestikket, sto huset ferdig, og det var klart for opningsfest.

Den store Fjellheim-festen

Laurdag 5. februar 1938 vart ståande som ein merkedag for Osbygda. Innviinga av huset skulle vara ”trio heile dagar til ende”, og Oseanaopninga er vel det næraste ein kjem denne storhendinga.

Til sjølve opninga var 350 gjestar inviterte. Ordførar Nils Tveit var sjølvsagt til stades, og blant dei meir prominente gjestane var teatersjefen ved Den Nationale Scene, Hans Jacob Nilsen. Teatersjefen hadde sjølv fleire opplesingar.

Os Musikk-og Turnforening framførde skodespelet ”Til Sæters”. Os Musikkforening`s orkester, under leiing av Mons H. Lyssand, sto sjølvsagt for musikken til stykket frå den nye musikkgrava framføre scenen.

Kino i Fjellheim

Søndag 6. februar skulle kinomaskina køyrast i gang, og tre fulle hus såg filmen Lous Pasteur. Filmen, som fekk tre Oscars, vart såleis første offisielle film i Fjellheim. Mange filmar skulle rulla over lerretet i Fjellheim dei neste femti åra. Det bør kanskje nemnast at stolane i Fjellheim var frå Den Nationale Scene, og kjøpt for ein rimeleg penge.

Måndag 7. februar var det klart for gjestespel med DNS og Ibsen-stykket ”Gengangere”, og med det var tre utrulege festdagar i Fjellheim over.

Framleis bruk for Fjellheim

I dag står står huset avstengt og ubrukt på andre året.

Det er berre vel 20 år sidan kommunen sjølv berga huset ved å kjøpa det, og gjennomførte ei storstilt rehabilitering.

Det kan ikkje vera tvil om at det framleis er bruk for Fjellheim, men i dag vil vi berre gratulere Fjellheim med 75 innhaldsrike år.

Tore Moberg