Fire kveldar med konsert og dans i desember
Beststovo har fått skjenkeløyve, og byr opp til dans både til helga og i romjula.
I 2019 sto andre etasje i den utvida bensinstasjon- og bilverkstaden klar.
Med trapp og heis opp til 300 nye kvadratmeter, godt utstyr med storkjøkken og fleksible møblar, var det klart for fest.
Men Tveit Eiendom AS, som i dag leiger ut til 7/Eleven og Snap Drive, fekk eit roleg 2020 med det nye selskapslokalet.
– Pandemien har prega mykje, men frå i haust har det vore mykje bruk av lokalet, med alt frå bryllaup og minestund tilkurs, møte, dåp og konfimarsjon, seier Rolf Tveit.
Han eig og driv eigedomen saman med søstrene, og har sjølv bakgrunn som konsertarrangør på fritida.
– Eg liker musikk og dans, no blir eg arrangør i vårt eige hus.
Tveit har fått ambulerande skjenkeløyve både til helga, 2. juledag og vesle nyttårsaftan.
E39 og Johny Olsen
Beststovo kan dekka til 250 gjestar, og framstår nesten som «Nye-Fjellheim» der dei ligg overfor kvarandre.
– Men vi sel berre 100 billettar per kveld, vi skal ha plass til å dansa òg.
Berre fullvaksinerte over 20 år får koma inn.
Bildeserie:
Alle dei fire dansekveldane blir med sal av mat og drikke, og levande musikk på scenen.
– Johny Olsen Band speler vesle nyttårsaftan. Eg sjekka med Os Live først, at ikkje dei skulle i gang med noko stort på Nore Neset.
Både førstkomande helg, fredag og laurdag, og 2. juledag, skal eit anna lokalt band på scenen.
Det relativt nye bandet E39 består av erfarne musikarar: Knut Egil Børnes (låtskriver, vokal og gitar), May-Eva Sandvik (vokal og gitar), Magnus Lyssand (gitar), Sven Åge Svendsen (bass) og yngstemann Magnar Bjørnevik (trommer).
– No håper eg at smittevernreglane fram mot helga og jula ikkje blir for strenge, at vi får gjennomført desse kveldane, seier Rolf.
