Fire dagar på flukt

Når Sarah skal vera venninne med menneska ho bur med så gulpar ho opp litt mat. Det var akkurat det ho gjorde ute på terrassen laurdag som var, medan far i huset skulle ta bort for å ta ho inn i buret igjen.

Men i staden for å lata seg fanga flaksa ho avgarde, ikkje berre ned på plenen, som ho av og til gjer, men opp i lufta, mellom trea med stø kurs mot Lysekloster.

- Sarah er vant til å vera ute og vant til å vera ute av buret, dette har aldri skjedd før. Vi trudde faktisk ikkje at ho kunne fly så langt, seier Randi Stenersen Rasmussen.

Godt selskap
Det er over to år sidan familien Rasmussen kjøpte Sarah, ein papegøye av sorten grå jako. Fuglen blei raskt eit populært medlem av familien, selskapssjuk, pratsam og underhaldande.

- Ho går på disken med meg når eg lagar middag, etterliknar telefonen, kjeftar på hunden, snakkar mykje og skiftar dialekt etter kven i huset ho etterliknar, fortel Randi, som sjølv har dialekt frå Stord.

Stakk til Søfteland
Sarah var sakna og eigarane leita og leverte ut lappar til lysekloster gård, politiet, dyrepensjonat, dyrebutikk, barnehage og i annonse i Os & Fusaposten.

Og onsdag kveld dukka papegøyen opp, hos ein av dei tilsette i Os & Fusaposten, som kjente fuglen igjen frå annonsen ho nyleg hadde laga.

- Sarah har ikkje så god trening med å landa, så ho hadde visst stupt rett i vindauga ved terrassen hennar.

Papegøyen fekk mat og omsorg og eigaren blei varsla så fuglen kunne hentast.

Prøvde å koma heim?
Fuglen stakk frå Åsen laurdag, flydde mot Lysekloster, men hamna seinare på terrassen til eit hus i bustadområdet bak skulen på Søfteland.

- Ho har kanskje prøvd å fly heim, men bomma på eit fjell og hamna over på denandre sida av Langedalen, seier Randi, glad for å ha fått fuglen heim.

- Sarah ser ut til å ha det fint, men fire dagar på vengjene har nok vore krevjande, no sit ho her på halv åtte i buret sitt.