Fin forsmak på nytt morgontilbod
Starta dagen med yoga ved fjorden? Oseana vil testa ut noko nytt i haust.
Bildeserie:
Då Oseana for to veker sidan sleppte haustprogrammet sitt, var det med blant anna utvida ungdomssatsing, ikkje minst innan humor, og med ein heilt ny aktivitet; «mindful yoga» i Griegsamlinga etterfølgd av frukost.
I dag, som del av Osdagane, var det tid for ein forsmak. Med sol og rundt 20 gradar blei yogaøkta utandørs.
– I dag tidleg var det 15 som hadde kjøpt billett, men det kjem kanskje fleire, sa Veronica Søilen Halhjem frå Oseana før start.
Då timen starta var det 20 deltakarar som hadde funne seg ei matte og sat klare til å få instruksjon av Karina Lyssand.
Karina driv Os Yoga i familieverksemda Lyssand Blomstersalg sitt bygg i Industrivegen. Til dagens time stilte 18 jenter og kvinner, ein mann og ein ung gut. To av dei har ikkje prøvd yoga før.
Timen var tilpassa alle nivå, og med litt ekstra fokus på skuldre og nakke.
To økter med frukost til hausten
Oseana gler seg over oppslutnaden, og det fine vêret, men dei to planlagte øktene i haust blir under tak.
Øktene i haust er etterfølgd av frukost i restauranten, og blir arrangert to laurdagar, den eine i september, den andre i slutten av oktober.
– «Mindful yoga» blir i kunstsamlinga. Utsikta og omgjevnadane er fin der òg, seier Veronica.
Yogatilbodet er ein prøve, og kan halda fram med auka frekvens seinare sesongar, om responsen er god.