Festmat frå, og rundt, Bjørnafjorden

Bildeserie:

Full skjerm

1 av 1

I februar inviterte næringssjef Daniel Skotheim, landbrukssjef Øystein Svalheim og mat-attaché hos Fylkesmannen Gunnar Nagell-Dahl produsentar, råvareseljarar, foredlarar, restaurantører og andre til samling i Oseana for å lodda interessa for å samle næringa i Bjørnefjorden Matkultur.

Interessa var stor, og raskt fekk ein på plass eit interimstyre.

Ved Bjørnafjorden måndag ettermiddag blei det markert at foreninga no er oppe og går med servering av TacOs frå Osøyro Kolonial og koking av tang plukka i Mobergsvikjo.

– No er vi på lufta med bjørnefjordenmatkultur.no og fått sendt inn stiftingpapira til Brønnøysundregistra, fortel næringssjef Daniel Skotheim.

Det store Bjørnefjorden måltidet

Det første store arrangementet foreininga står bak blir «Det store Bjørnefjorden måltidet» med råvarer kun frå dei fire kommunane rundt Bjørnafjorden.

– «Det store Bjørnefjorden måltidet» blir i Oseana 7. oktober. Der kjem du til å få servert minimum ein sjurettars meny med råvarer frå Os, Fusa, Tysnes og Samnanger.

– No er vi på jakt etter fleire produsentar som har lyst til å vera med å bidra med råvarar. Dei får sjølvsagt betalt for varene, så det er ikkje snakk om veldedighet, men ein måte å få profilert varene ein produserar og ikkje minst få løfta opp og fram dei utruleg spennande råvarene vi finn rundt Bjørnafjorden, seier Skotheim.

Berre 200 plassar

I tillegg til å jakta produsenter, har foreininga no også lagt ut billettane til «Det store Bjørenfjorden måltidet».

– Billettane blei lagt ut på heimesida vår i dag, så no er det berre å vera om seg. Det er berre 200 plassar, og ut frå interessa på førehand reknar eg med at dei forsvinn raskt.

Salt og tang frå Bjørnefjorden

Menyen er enno ikkje satt. Det kjem ann på kva råvarer som produsentane i og rundt fjorden leverer, men nokre ting er klart allereie. Matattache Gunnar Nagell Dahl vil leie kokkelauget med god hjelp frå Haaheim Gaard, Eikhaugen Gjestegard, Osteriet i Samnanger, Bjørnefjorden Gjestetun, Engevik Gaard, Mæland Gård, Oseana, gardane på Bø, Havnechefen, Garden på Dalland og Osøyro Kolonial.

I tillegg tek landbrukssjef Øystein Svalheim mål av seg å sørgje for salt til krydringa.

– Eg har planar om å koke salt frå Bjørnefjorden. Kor mykje salt trur du trengs, Gunnar, undra landbrukssjefen.

– Det er ein gamal tradisjon i fjordane her å koka salt. Det blir vel sagt at du får fire gram per liter vatn, så du må nok koka ein del liter. Dei andre kryddera vi treng skal vi òg klara å finna rundt fjorden. Honning kan vi nytte til sødme og ruccola som erstatning til pepper. Også tang frå fjorden kan vi nytta som smaksforsterkar, tildømes på torsken. Det har blitt ei særs populær råvare den siste tida. Visste du forresten at grisetang blir kalla havtrøffel fordi den minna så mykje om vanleg trøffel, svara ein entusiastisk Nagell Dahl.