Ferjefri E39 må svinga unna fleire artar
På oppstartmøtet for Aksdal-Bergen måndag fortalte Fylkesmannen om svært sjeldne artar både i Bårdsundet og på Storum.
Bildeserie:
Fleire av ordførarane som hadde ordet under Statens vegvesen sitt oppstartmøte for ferjefrie E39 Aksdal-Bergen i Os måndag, var opptatt av at det ikkje skulle dukka opp show-stopparar i siste liten.
Les òg:
• Forsvaret gjev frå seg 20 prosent av fjorden
• Fekk innspel til Aksdal-Bergen
Den sjeldne augestikkaren Stor Torvlibelle sitt habitat i Endelausemarka i prosjektet E39 Svegatjørn - Rådal fekk som kjent konsekvensar.
– Den historia er i grunnen eit godt eksempel til våre haldningar til artsmangfald, og vi fekk ei fantastisk løysing på utfordringa der vi ved omlegging av vegen sikra både prosjektet og den sjeldne augestikkaren.
– Enkelte vil kanskje seia at ein augestikkar eller ein planteart ikkje er så viktig, men vern av desse er lovpålagt i Noreg, i tillegg til at vi har forplikta oss til dette via internasjonale avtalar, sa assisterande fylkesmann, Rune Fjeld, på oppstartmøtet.
Utbygging er hovudutfordringa
Årsaka til at plan- og bygg, anten det er bustad eller veg, må ta ekstra omsyn, er at dei er hovudsyndarane når det kjem til truga artar.
– Av dei raudlista artane som er truga, er 87 prosent truga på grunn av arealbruk, av utbygging, sa Fjeld.
Viktig funn av truga mose på Storum
Fjeld fortalte om regnskogen i kommunar rundt Bjørnafjorden, spesielt rundt Bårdsundet mellom Tysnes og Reksteren er det tett med boreonemoral regnskog.
– I 2008 blei det gjort undersøkingar i regnskogen rundt Bårdsundet, og det blei funne fem planteartar som er heilt nye i Noreg. Fire av dei var også nye i Skandinavia.
Ordførar i Os, Terje Søviknes, hadde tidlegare i møtet sagt klart ifrå at Os kommune ikkje vil ha brulanding i Øyane. Der fekk han støtte av fylkesmannen.
– På Storum ved Lepsøy er det funne ein veldig sjeldan moseart, Tagghinnemose (Plagiochila norvegica). Denne arten er berre funnen éin annan stad i Noreg, fortalte han.
Men på kartet over viktige funn i Os ser vi også eit stort, raudt felt rett nordaust for Bjørnatrynet, som er brulanding-alternativet Os kommune har anbefalt.
Muslingen i Oselvo
Sjølv om ferjefri E39 ikkje ser ut til å koma i nærleiken av Osvassdraget, nemnte Fjeld også den sjeldne elvemuslingen.
– 95 prosent av elvemuslingane i Europa er utrydda. I Hordaland er bestanden halvert.