– Fekk trugslar i forkant
Lensmann Rasmus Dalen seier konflikten som utløyste væpna aksjon i Os i går starta for ei tid tilbake. Både tysdag kveld og onsdag på dagtid rykte politiet ut på melding om trugslar.
Onsdag kveld blei hundepatrulje og pansra politikjøretøy sendt frå Bergen til Os for å bistå ein aksjon i Byvegen.
Les òg: Truga av utanlandsk gjeng
Også luftambulansen var på vingene, men helikopteret gjorde retur.
Kom med trugslar i forkant
– Det handlar om ein konflikt mellom to utanlandske familiar eller grupperingar, ein konflikt som starta for ei tid tilbake, seier lensmann Rasmus Dalen.
– Dei to grupperingane har hatt fleire mindre trefningar den siste tida, men ikkje som i går.
Politiet i Os rykte ut på melding om trugslar både tysdag kveld og onsdag på dagtid.
Jobbar vidare med saka
Onsdag kveld skal den eine utanlandske gjengen ha kome heim til den andre familien og vifta med noko som truleg er eit våpen.
Dalen vil førebels ikkje ut med fleire detaljar i saka, om kva konflikten handlar om eller om kva som fekk gjengen til å kjøra frå staden før politiet kom fram.
– Vi etterforskar saka vidare og vil ha meir fakta på bordet så vi finn ein måte å få dette ut av verda på.
– Fekk de tak i den andre parten i går, at de har fått samtalar med dei som er mistenkt for å ha truga med skytevåpen?
– Det vil eg førebels ikkje seia noko om. Men vi vil naturlegvis sjå om det er grunnlag for oss å koma med nokre reaksjonar.
Dalen vil heller ikkje seia noko om korleis politiet i natt tok hand om familien som blei truga av den utanlandske gjengen.