Fekk testa ny idrett

I nydeleg haustvêr på Kuventræ arrangerte Os ungdomsskule idrettsdag torsdag. På delar av den nye kunstgrasbanen sprang 25 ungdommar rundt på jakt etter kvarandre og ikkje minst dei gule "halane" dei hadde hengt på seg.

– Dette er ein introduksjon til amerikansk fotball, kalla flaggfotball, forklarar coach på Os Wolverines, Christian Detjen.

Stor respons

Saman med dagleg leiar i Os Turn, som Wolverines er ein del av, tok Detjen tidlegare i haust kontakt med ungdomsskulen for å tilby seg å vera instruktør i flaggfotball på idrettsdagen. Saman med seg fekk han fleire av spelarane på Wolverines.

– Eg er overvelda over responsa. Heile 50 elevar meldte seg på flaggfotballen i konkurranse med dei andre aktivitetane, fortel Hans Parnefält.

– Interessa var faktisk så stor at vi måtte dele gruppa i to, slik at alle skulle få prøva.

Nappa "hale"

Flaggfotballen minnar mykje om amerikansk fotball. Ballen er den same, det handlar om å få touch-down, men taklingane er mykje snillare.

– I staden for kroppskontakt og tøffe taklingar handlar flaggfotball om å nappe ei av dei to snorene som heng ned frå eit belte hjå spelarane.

– Blir "halen" nappa mistar du ballen, forklarar Detjen, medan elevane gjev alt for å stoppa motstandarane.

– Eit godt alternativ

Detjen og Parnefält innrømmer at det ikkje berre er for å vera snille dei tilbaud seg å vera instruktører på idrettsdagen.

– Vi håper sjølvsagt at det kan vera med på å rekruttera fleire spelarar til ungdomsgruppa i Wolverines.

– I dag er vi 10-12 spelarar i alderen 9-13 år.

– Amerikansk fotball er eit godt alternativ til dei som ikkje heilt finn seg til rette i fotball eller handball. Vi treng spelarar av alle typar og fasonger.

– Nokre passar gjerne best i forsvar, medan andre som gjerne er små, er ypperlege som angriparar, forklarar dei to.

– Målet er at vi i 2014 skal klara å stille eit U15-lag og kanskje eit U13-lag i sesongen etter.

– Om det er nokon som har lyst å prøva, er det berre å ta kontakt med oss, avsluttar Hans Parnefält.