Fekk sparken - må ut med 82.000 kroner

Ein utanlandsk mann som frå 2007 til 2012 har jobba ved ei industriverksemd i Os, saksøkte selskapet han jobba for etter at han i desember i fjor fekk sparken.

Årsaka til at han mista jobben var at han ifølgje arbeidsgjevar slurva i jobben, hadde problem med å samarbeida med andre og at han ikkje tok tryggleik på alvor.

Den tilsette, som er i 50-åra, meinte at dette med tryggleik var noko han sjølv hadde tatt opp med arbeidsgjevar fleire gongar, for at dei skulle ivareta dette betre.

I tillegg så meinte han at han blei mobba på arbeidsplassen.

Slurv og sur stemning

Men retten festa mest lit til arbeidsgjevar og kollegaer som vitna. Dei fortalte om mykje og omfattande slurv, om varer som måtte tilbake til verksemda for å gjera delar eller alt arbeid på nytt, og at saksøkar blei sur og tverr om det blei påpeika at han måtte utføra arbeidet meir presist.

Fleire av dei tilsette nekta til slutt å jobba saman med saksøkar.

Dårleg arbeid, fleire gongar også enkelt arbeid etter tydelege teikningar, førte til fleire betydelege økonomiske tap for selskapet.

Det mest alvorlege ankepunktet til saksøkar var tryggleiken, spesielt episoden som leia til at han måtte gå.

Berre fire dagar etter eit møte med saksøkar, der dette med haldningar til tryggleik blei tatt opp, var han nær på å skapa ei alvorleg ulykke.

Han hadde, mot instruks, brukt ein kran som alle i verksemda hadde fått beskjed om skulle stå i ro medan andre handverkarar var i verkstaden for å utføra arbeid. Saksøkar henta likevel fram fjernkontrollen til kranen og var nær på å skada dei to.

Arbeidsgjevar blei frikjent og saksøkar må dekka arbeidsgjevar sine sakskostnadar, som er på 81.715 kroner.