Fekk fire meldingar om feststøy
Den eine huseigaren måtte få fleire beskjedar.
Mens det er skjenkestopp i serveringsbransjen, serverer folk seg sjølv og gjestar heime.
Natt til laurdag fekk politiet fire meldingar om feststøy, to av dei frå same adresse.
– I 23.30-tida fekk vi melding om feststøy frå ei privat adresse på Nore Neset. Vi var i kontakt med huseigar, som dempa musikken, fortel vakthavande ved Bjørnafjorden politistasjon.
Men i 01-tida kom ny klage på støy frå same hus.
– Patruljen køyrde ut og gav eigar pålegg om å halda støynivået nede. Vi fekk ikkje fleire klagar frå adressa.
I 01.30-tida kom det to andre klagar på feststøy. Dette var frå festar i Kuvågen-området. Her blei det ingen tiltak frå politiet.
Utforkøyring
Tidlegare på kvelden, litt før klokka 18, var det ei utforkøyring på E39 litt overbygrensa nord for Røykenes.
– Bilførar var åleine i bilen. Det er ikkje meldt om personskade, men han blei tatt med til legevakt for sjekk.
Det var køar på E39 i ein periode etter ulykka.
– Det er ikkje mistanke om køyring i rus, men det er oppretta sak. Bergen Sør politistasjon følgjer opp saka.
