Fekk bank av tre menn i bil

Klokka 02.45 natt til søndag blei politiet kontakta av ein mann som fortalte at han hadde fått bank av tre menn.

– Han skal ha stått utanfor Esso-stasjonen då ein bil kom kjørande. Ut kom tre menn, som hadde slått til han, seier politiførstebetjent Audun Hadler-Olsen.

Mannen skal ha blitt lettare skadd. I tillegg blei brillene hans knust.

– Ifølgje han sjølv var dette uprovosert, men vi har namnet på fleire av dei involverte og vil følgja opp saka.

Sakna eigedelar etter slåstkamp

Natt til laurdag var det slåstkamp på Irish Cat.

– Då vi kom fram hadde det roa seg og ingen av partane ville melda episoden.

– Men ein av dei sakna nokre eigedelar etter basketaket, og fekk desse igjen av motparten.

Kvinne lagde bråk

Laurdag kveld kontrollerte politiet ein kameratgjeng i 20-åra, etter melding om mistanke om narkotikamisbruk.

– Dei blei ransaka, men hadde ikkje noko på seg.

Natt til søndag fekk politiet melding om ei kvinne som skapte trøbbel på Bar2Be.

– Ho var kranglete med både gjestar og vaktar, og fekk pålegg om å fjerna seg frå Os sentrum.

Hindra kappkjøring?

Laurdag på dagtid var politiet og leverte valdsalarm til ei dame i Os.

Rett før midnatt stoppa dei to bilar dei meiner skulle til å kappkjøra.

– Vi har hatt nokre meldingar om kappkjøring den siste tida, og i Idrettsvegen ved Byvegen kom vi over ein volvo 740 og ein volvo 940 som såg ut til å ha rigga seg til start.

– Men vi fekk ein prat med førarane, to menn i starten av 20-åra, som lovde å kjøra fint.

Alle var edru på Ulvensletta

Frå klokka 01.30 til 02.30 hadde politiet promillekontroll på Ulvensletta ved avkjørlsa inn til Ådnadalen (Lidl-lageret).

– Vi kontrollerte 13 bilførarar, alle var edru