Fekk 3. plass i Skåla Opp

Bildeserie:

Full skjerm

1 av 3

Mens 266 sprekingar deltok i Osløpet på heimebane var over 15 motbakkeløparar i Loen, heilt nord i Sogn og Fjordane, for å delta i årets Skåla Opp.

Skåla blir rekna som Noregs høgaste fjelltopp med foten i sjøen, og på toppen står eit tårn med 22 sengeplassar, bygd i 1891.

– Eg fekk 3. plass i fjor òg, men då flytta dei målstreken eit godt stykke ned frå toppen. Det var dårleg sikt og ein del snø på toppen, så dei kunne ikkje gjennomføra i full løype, seier Erik Vaktskjold (16) frå Opptur Motbakkeklubb.

Også på full distanse klarte han 3. plass i klassen sin (gutar 15-17 år). Erik sprang opp på 1:32:48. Vinnaren av klassen, den same som i fjor Per Christian Grieg frå Varegg, kom i mål på 1:23:07.

– Eg er nøgd både med tida mi og med plasseringa, seier Erik, som har hatt ein svært god sesong til no, med blant anna siger i klassen sin i Bergen City Marathon og 2. plass i Ulriken Opp.

– Neste no er nok Langedalen Opp, mens hovudmålet for sesongen er Stoltzekleiven Opp (Stoltzen).

5 løparar i mål på under 2 timar

Opptur Motbakkeklubb stilte med 15 deltakarar, 5 i trimklassen og 10 på tidtaking.

Kjetil Styrvoll i klassen 45-49 år blei nest raskaste frå Os med tida 1:46:50, men måtte sjå seg slått av klubbvenninne Karin Hilstad frå Fana som kom i mål på 1:45:14. Karin kom på 4. plass i klassen 35-39 år.

Andreas Skulstad Størkson tok 8. plass i same klassen som Vaktskjold med tida 1:51:06, mens Erik sin far, Trond Inge Nilsen, sprang i mål på 1:54:19.

• Sjå fleire resultat i skjema i bildeserien over.
• Sjå alle resultat på EQtiming.no.

Byggmester Markhus stilte òg med mange deltakarar, blant andre ekteparet Tore Sælen og Kjersti Heggland frå Os.

Smeden Sælen var blant dei raskaste handverkarane til topps, han kom i mål på 2:13:18.

Raskast uansett klasse i årets Skåla Opp blei Stian Angermund-Vik, som kom i mål på 1:10:10.